Бош прокуратура ҳузуридаги департаментнинг Фарғона вилояти, Бағдод тумани бўлими томонидан ҳудудда унни аҳолига кафолатли тарзда ва арзон нархда етказиб беришга таъсир кўрсатаётган шахслар тўғрисида олинган маълумотлар тезкор гуруҳ томонидан зудлик билан ўрганилди, деб хабар берди Бош прокуратура матбуот хизмати.
Ўтказилган терговга қадар текширувда аниқланишича, оилавий корхона ва кўп тармоқли фирма раҳбари И.М. Товар хом ашё биржаси орқали ун сотиб олишда шубҳа уйғонишининг олдини олиш ҳамда нархларни ошириб, бошқа харидорларни савдодан чиқариш мақсадида корхона ишчи ва хизматчилари ҳамда ўзининг қариндошлари номига 10 та оилавий корхона, 5 та якка тартибдаги тадбиркорлик субъектини ташкил қилган.
Ташкил этилган номинал корхоналар ва якка тартибдаги тадбиркорлик субъектларини И.М. ўзи амалда юритиб, ушбу корхона раҳбарларининг хабардор қилмасдан, Товар-хом ашё биржаси орқали дон маҳсулотлари корхоналаридан ун сотиб олиш учун брокерлик хизмати кўрсатиш тўғрисидаги шартномаларда имзоларни сохталаштириб тақдим этган.
Сўнгра И.М. брокерлар орқали сотиб олинган унларни олиб чиқиш учун ишончнома ҳамда бошқа ҳужжатлардаги имзоларни сохталаштириб, 2019 йилнинг октябрь ойидан 2020 йилнинг 15 апрелига қадар жами 18,3 миллиард сўмлик 7 800 тонна унни олиб, нархларни сунъий равишда оширган ҳолда аҳолига сотаётганлиги аниқланган.
Мазкур ҳолатлар юзасидан И.М.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда. Жиноят иши вилоят прокуратураси томонидан алоҳида назоратга олинган.
Мавзуга доир:
- «Ўздонмаҳсулот» ишлаб чиқарган бир қоп ун нархи 125 минг сўм қилиб белгиланди. Энди ун биржа савдоларисиз сотилади
- Ўзбекистонда 2020 йил охиригача ун, гўшт, сут ва шакарни импорт қилишда божхона божи ва акциз солиғи ундирилмайди
- Самарқандда эҳтиёжманд оилалар учун мўлжалланган арзон уннинг қопига 15 минг сўм қўшиб сотган маҳалла раиси қамалди
Изоҳ (0)