Qashqadaryo viloyatining Qarshi tumanida yashovchi mahalla ahli davlat qonunlarini chetlab o‘tib, saylanishi lozim bo‘lgan raisni tayinlashga urinayotgan hokim o‘rinbosaridan shikoyat qilmoqda.
Bu haqda “Daryo”ga ma’lum qilgan Toshpo‘lat Bo‘riyevning aytishicha, Qarshi tumani hokimi o‘rinbosari Hasan Turdiyev “Mevazor” mahallasida yashovchi aholining e’tiroziga qaramay, mahallaga rais tayinlashga harakat qilmoqda.
“Hokim o‘rinbosari kelib, kuni kecha Rossiyadan qaytgan yosh yigit mahallamizga rais bo‘lishini aytdi”, — deydi Toshpo‘lat Bo‘riyev. — ‘MFY raislari saylanadi, nega siz raisni tayinlayapsiz’ deb e’tiroz bildirsak, mahalla aholisi ko‘rsatayotgan nomzodlar keksaligini ro‘kach qilmoqda.
Murojaatchilar bergan ma’lumotga ko‘ra, mahallaning sobiq raisi Abror Gulov viloyat hokimi Zoir Mirzayevning tumanga tashrifidan so‘ng ishdan olingan.
“Rais tomorqachilik bo‘yicha berilgan vazifalarni uddalay olmagan shekilli, viloyat hokimi tashrifidan so‘ng ishdan ketdi”, — deydi “Daryo” muxbiri bilan suhbatlashgan shikoyatchilar.
Mahalla ahli hokimlik tomonidan raislikka tayinlanayotgan nomzodni yaxshi tanimasligini bildirmoqda.
“Hokimlik tomonidan tayinlanayotgan rais Akmal Elboboyevni biz yaxshi tanimasak, bilmasak”, — deydi shu mahallada yashovchi Umida Choriyeva.
Mahalla ahlining shikoyati qay darajada o‘rinli ekanligini bilish maqsadida Qarshi tumani hokimi o‘rinbosari, mahalla va oilani qo‘llab-quvvatlash bo‘limi boshlig‘i Hasan Turdiyev bilan muloqot qilishga urindik. Ammo harakatlarimiz zoye ketdi.
“Daryo” muxbiri bilan telefon orqali suhbatlashgan Qarshi tuman hokimligi tashkiliy nazorat guruhi rahbari Nuriddin Qo‘ldoshev mahalla ahlining shikoyatini rad etdi. Va ular hokimlik tomonidan tayinlangan deyilayotgan nomzod MFYning kuzatuv kengashi tomonidan tavsiya qilinganini bildirdi.
“Murojaatchilar bizga qo‘ng‘iroq qilib, muammoni bildirishsin, bartaraf qilamiz”, — dedi Nuriddin Qo‘ldoshev.
Ammo Toshpo‘lat Bo‘riyev mas’ulga qo‘ng‘iroq qilganda, hokimlik vakili telefonini o‘chirib qo‘ygan va murojaatchi bilan gaplashishni istamagan.
“Hokimlik bizni eshitishni istamayapti, ular bilganidan qolmay raisni tayinlashadi va yana qonun buzilish holati ro‘y beradi”, — deydi Toshpo‘lat Bo‘riyev.
Izoh (0)