Қашқадарё вилоятининг Қарши туманида яшовчи маҳалла аҳли давлат қонунларини четлаб ўтиб, сайланиши лозим бўлган раисни тайинлашга уринаётган ҳоким ўринбосаридан шикоят қилмоқда.
Бу ҳақда «Дарё»га маълум қилган Тошпўлат Бўриевнинг айтишича, Қарши тумани ҳокими ўринбосари Ҳасан Турдиев «Мевазор» маҳалласида яшовчи аҳолининг эътирозига қарамай, маҳаллага раис тайинлашга ҳаракат қилмоқда.
«Ҳоким ўринбосари келиб, куни кеча Россиядан қайтган ёш йигит маҳалламизга раис бўлишини айтди», — дейди Тошпўлат Бўриев. — ‘МФЙ раислари сайланади, нега сиз раисни тайинлаяпсиз’ деб эътироз билдирсак, маҳалла аҳолиси кўрсатаётган номзодлар кексалигини рўкач қилмоқда.
Мурожаатчилар берган маълумотга кўра, маҳалланинг собиқ раиси Аброр Гулов вилоят ҳокими Зоир Мирзаевнинг туманга ташрифидан сўнг ишдан олинган.
«Раис томорқачилик бўйича берилган вазифаларни уддалай олмаган шекилли, вилоят ҳокими ташрифидан сўнг ишдан кетди», — дейди «Дарё» мухбири билан суҳбатлашган шикоятчилар.
Маҳалла аҳли ҳокимлик томонидан раисликка тайинланаётган номзодни яхши танимаслигини билдирмоқда.
«Ҳокимлик томонидан тайинланаётган раис Акмал Элбобоевни биз яхши танимасак, билмасак», — дейди шу маҳаллада яшовчи Умида Чориева.
Маҳалла аҳлининг шикояти қай даражада ўринли эканлигини билиш мақсадида Қарши тумани ҳокими ўринбосари, маҳалла ва оилани қўллаб-қувватлаш бўлими бошлиғи Ҳасан Турдиев билан мулоқот қилишга уриндик. Аммо ҳаракатларимиз зое кетди.
«Дарё» мухбири билан телефон орқали суҳбатлашган Қарши туман ҳокимлиги ташкилий назорат гуруҳи раҳбари Нуриддин Қўлдошев маҳалла аҳлининг шикоятини рад этди. Ва улар ҳокимлик томонидан тайинланган дейилаётган номзод МФЙнинг кузатув кенгаши томонидан тавсия қилинганини билдирди.
«Мурожаатчилар бизга қўнғироқ қилиб, муаммони билдиришсин, бартараф қиламиз», — деди Нуриддин Қўлдошев.
Аммо Тошпўлат Бўриев масъулга қўнғироқ қилганда, ҳокимлик вакили телефонини ўчириб қўйган ва мурожаатчи билан гаплашишни истамаган.
«Ҳокимлик бизни эшитишни истамаяпти, улар билганидан қолмай раисни тайинлашади ва яна қонун бузилиш ҳолати рўй беради», — дейди Тошпўлат Бўриев.
Изоҳ (0)