“Chelsi” klubi xizmatchilarga haq to‘lash borasida hukumat loyihasida qatnashishni istamadi. Klub barcha xodimlari va ishchilari maoshini to‘liq qoplashda davom etadi.
O‘yin kunlarida jalb qilinadigan vaqtinchalik ishchilar ham 30-iyunga qadar eski tizim bo‘yicha maosh oladi.
Ayollar jamoasi va ayollar akademiyasini qo‘llab-quvvatlash ham avvalgidek tizimda davom etadi. Ta’kidlanishicha, “ko‘klar”ning ayollar jamoasi klubning xayriya aksiyalarida faol ishtirok etmoqda.
Agar “Stemford Brij”dagi qolgan o‘yinlar o‘tkazilmasa, bekor qilinsa yoki tomoshabinlarsiz o‘tsa, u holda “Chelsi” abonement egalariga pulni qaytaradi.
Bundan tashqari, klub Chempionlar Ligasi 1/8 finali doirasida “Bavariya”ga qarshi o‘yinga borishni reja qilgan 3800 nafar muxlisning har biriga 350 funtdan kompensatsiya to‘laydi. O‘yin 18-mart kuni o‘tishi kerak edi.
Barcha qarorlar Roman Abramovich boshchiligidagi “Chelsi” rahbariyati tomonidan tasdiqlangan.
O‘tgan haftada “Chelsi” futbolchilari maoshning 10 foizga kamayishiga rozi bo‘lgani xabar qilingandi. Bosh murabbiy Frenk Lempard esa maoshining 25 foizidan voz kechgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)