“Barselona” va “Chelsi” o‘rtasida talash bo‘lishi kutilayotgan, braziliyalik “kechikkan yulduz” — Aleks Telles haqida

“Barselona” va “Chelsi”ning chap qanot himoyasida qanday o‘xshashlik bor? Deyarli hech qanday! “Barselona”da dunyoning eng yaxshi chap qanot himoyachilaridan biri Xordi Alba bor. “Chelsi”da esa bunday darajadagi futbolchi yo‘q.

Londonliklar ustozi Frenk Lempard esa o‘zining eng yaxshi davrlari ortda qolgan ikki futbolchiga suyanishga majbur bo‘lmoqda. Na Markos Alonso va na Emersonning hozirgi kunda biror-bir grand klubga katta nafi tegishi amri mahol. Unda ikkala klubning bog‘lab turgan umumiy jihat nima dersiz? Ayni damda kataloniyaliklar ham, londonliklar ham chap qanot himoyasini mustahkamlash niyatida. Va, albatta, ikkalasi ham Aleks Tellesga da’vogarlik qilmoqda.

Braziliyalik futbolchi unchalik yosh ham emas, 27 bahorni qarshilab qo‘ygan. Mamlakat bosh jamoasida esa roppa-rosa bir yil oldin ko‘rinish bergan. Ammo buni tushunish mumkin. Braziliya terma jamoasida kimsan Marselo, Aleks Sandro, Filipe Luis va Renan Lodilarga raqobat qilish lozim edi.

Biroq Tellesni butun Portugaliyada yaxshi bilishadi. Ayni damdagi “Portu”ni Alekssiz tanib bo‘lmaydi. U jamoa tarkibidagi, so‘zsiz eng yaxshisi. Kim o‘zi bu yigit, nima uchun yangi mavsumda u qaysi klub safida bo‘lmasin — nigohlar unga qaratilishi kerak?

Xullas, Aleks Telles kim?

Aleks Telles nomini ko‘pchilik 2014-yilda tanigan. O‘sha yili futbolchi vatanidan Turkiyaning “Galatasaroy” klubiga o‘tgan. Shundan so‘ng u bir muddat Milanning “Inter”ida harakat qiladi. Keyin esa “Portu” safiga borib qo‘shiladi.

Telles o‘z ampluadoshlari kabi ajoyib krosslarni amalga oshirishi, hujumni tezlashtirish qobiliyatlariga ega. Ammo uning yashirin iste’dodi ham bor. Har holda angliyalik va ispaniyalik hamkasblari uchun yashirin iste’dodi mavjud. Portugaliyada esa uni hamma yaxshi biladi. Aleks yo‘q joydan paydo bo‘lib qolib ham uzoqdan darvozani o‘qqa tutishi mumkin. U bu ko‘rinishdagi gollarni tez-tez urib turadigan himoyachi. Haqiqiy yashirin qurolga o‘xshaydi.

U himoyalana oladi, hujum qiladi va jamoani ortidan ergashtiradi. Yana nimani xohlash mumkin?

Telles Portugaliyada o‘zini qanchalik ko‘rsata oldi?

Portugaliyadagi 4 yil ichida Aleks 16 ta gol urdi. Ha, goleadorlik jihatidan u xuddi Markos Alonsoga o‘xshaydi. Biroq boshqa har qanday ko‘rsatkichlarda uni ortda qoldiradi.

Portugaliyada futbolchi o‘sishdan to‘xtamadi. U bu yerda raqib jarima maydonida to‘p bilan va to‘psiz yugurishni mohirlik bilan o‘zlashtirdi. Bundan tashqari penalti ham tepadi. Tepganda ham bu ishni juda yaxshi amalga oshiradi.

Futbolda raqiblaring qanchalik yaxshi bo‘lsa, sen ham shunchalik yaxshi, kuchliroq bo‘lasan degan gaplar yuradi. Bu esa ayni haqiqat. “Portu”ning raqiblariga qarshi Telles har doim juda yaxshi o‘yin namoyish etgan. Endi esa uning boshqa ligada, bo‘lganda ham kuchliroq ligada o‘zini qanday ko‘rsatishini kuzatish qoldi, xolos.

Braziliya terma jamoasidagi ahvoli qanday?

Terma jamoadan chetda bo‘lish futbolchining iste’dodli emasligidan yoki boshqalardan kuchsizligidan dalolat bermaydi. Bunga yaqqol misol sifatida “Manchester Siti”da javlon urayotgan Aymerik Lyaportni ko‘rsatish mumkin. Telles ham Lyaport (Fransiya terma jamoasi Rafael Varan, Samyuel Umtiti markaziy himoyada asosiy rolni o‘ynaydi) singari terma jamoadagi o‘ta kuchli raqobatdan aziyat chekishga majbur. Shu o‘rinda 27 yoshni urib qo‘ygan Telles terma jamoa borasida omadi kelmaganiga shunchaki ko‘nikib bo‘lgan.

Ha aytgancha, Aleksda Italiya pasporti bor. Demak, unda mazkur yurt bosh jamoasida o‘ynash imkoniyati ham. Ammo Italiya terma jamoasining ayni damdagi ustozi Roberto Manchini “Chelsi” vakili Emersonga ishonch bildirmoqda — hozircha. Kelajakda hamma narsa bo‘lishi mumkin.

Kuchli tomonlari

Kuchli zarbalaridan tashqari unda raqib jarima maydonida tajovuzkor harakat qilish bilan ham ajralib turadi. Telles tezkor krosslarni amalga oshiradi. Kutilmagan tezligi bilan hayron qoldirishi mumkin. Texnikasi yuqori, himoyada ham, hujumda ham birdek foydali. Ikkala oyoqda ham birdek o‘ynay oladi. U asosiy “quroli” bo‘lmagan ong oyog‘ida ham zarba berishdan qo‘rqmaydi.

“Barselona” va “Chelsi”ni ham jalb qilayotgan eng asosiy sifati esa chidamlilik. U hech qachon charchab qolmaydi.

Kimga o‘xshaydi?

Aleks ko‘proq Antonio Konte vaqtidagi Markos Alonsoni eslatib yuboradi. Raqib maydoniga xuddi Maykondek kirib boradi. Himoyada esa Lyuka Ernandes yoki Benjamen Pavarni eslatib yuboradi. Biroq uni kimgadir o‘xshatish baribir ixtiyoriy. Tanlov o‘zingizda.

APLga to‘g‘ri keladimi?

Angliya Premyer Ligasidagi Portugaliyadagi kabi “Tondela” singari kuchsiz raqiblar deyarli yo‘q. Ammo bu hehc narsani o‘zgartira olmaydi. Boisi Telles yuqori darajada to‘p tepishga 100 foiz tayyor. Katta ehtimol Aleks juda tez vaqt oralig‘ida o‘z pozitsiyasida eng yaxshi futbolchiga aylanishi mumkin. APLga ham Aleks singari kuchli chap qanot himoyachilari yetishmayotgnai ayni haqiqat. Manbalaga ko‘ra, Tellesning transferi klublarga 35-40 mln yevro atrofida tushishi mumkin. U bunga arziydimi? Albatta!