«Барселона» ва «Челси»нинг чап қанот ҳимоясида қандай ўхшашлик бор? Деярли ҳеч қандай! «Барселона»да дунёнинг энг яхши чап қанот ҳимоячиларидан бири Хорди Альба бор. «Челси»да эса бундай даражадаги футболчи йўқ.
Лондонликлар устози Фрэнк Лэмпард эса ўзининг энг яхши даврлари ортда қолган икки футболчига суянишга мажбур бўлмоқда. На Маркос Алонсо ва на Эмерсоннинг ҳозирги кунда бирор-бир гранд клубга катта нафи тегиши амри маҳол. Унда иккала клубнинг боғлаб турган умумий жиҳат нима дерсиз? Айни дамда каталонияликлар ҳам, лондонликлар ҳам чап қанот ҳимоясини мустаҳкамлаш ниятида. Ва, албатта, иккаласи ҳам Алекс Теллесга даъвогарлик қилмоқда.
Бразилиялик футболчи унчалик ёш ҳам эмас, 27 баҳорни қаршилаб қўйган. Мамлакат бош жамоасида эса роппа-роса бир йил олдин кўриниш берган. Аммо буни тушуниш мумкин. Бразилия терма жамоасида кимсан Марсело, Алекс Сандро, Филипе Луис ва Ренан Лодиларга рақобат қилиш лозим эди.
Бироқ Теллесни бутун Португалияда яхши билишади. Айни дамдаги «Порту»ни Алекссиз таниб бўлмайди. У жамоа таркибидаги, сўзсиз энг яхшиси. Ким ўзи бу йигит, нима учун янги мавсумда у қайси клуб сафида бўлмасин — нигоҳлар унга қаратилиши керак?
Хуллас, Алекс Теллес ким?
Алекс Теллес номини кўпчилик 2014 йилда таниган. Ўша йили футболчи ватанидан Туркиянинг «Галатасарой» клубига ўтган. Шундан сўнг у бир муддат Миланнинг «Интер»ида ҳаракат қилади. Кейин эса «Порту» сафига бориб қўшилади.
Теллес ўз амплуадошлари каби ажойиб кроссларни амалга ошириши, ҳужумни тезлаштириш қобилиятларига эга. Аммо унинг яширин истеъдоди ҳам бор. Ҳар ҳолда англиялик ва испаниялик ҳамкасблари учун яширин истеъдоди мавжуд. Португалияда эса уни ҳамма яхши билади. Алекс йўқ жойдан пайдо бўлиб қолиб ҳам узоқдан дарвозани ўққа тутиши мумкин. У бу кўринишдаги голларни тез-тез уриб турадиган ҳимоячи. Ҳақиқий яширин қуролга ўхшайди.
У ҳимоялана олади, ҳужум қилади ва жамоани ортидан эргаштиради. Яна нимани хоҳлаш мумкин?
Теллес Португалияда ўзини қанчалик кўрсата олди?
Португалиядаги 4 йил ичида Алекс 16 та гол урди. Ҳа, голеадорлик жиҳатидан у худди Маркос Алонсога ўхшайди. Бироқ бошқа ҳар қандай кўрсаткичларда уни ортда қолдиради.
Португалияда футболчи ўсишдан тўхтамади. У бу ерда рақиб жарима майдонида тўп билан ва тўпсиз югуришни моҳирлик билан ўзлаштирди. Бундан ташқари пенальти ҳам тепади. Тепганда ҳам бу ишни жуда яхши амалга оширади.
Футболда рақибларинг қанчалик яхши бўлса, сен ҳам шунчалик яхши, кучлироқ бўласан деган гаплар юради. Бу эса айни ҳақиқат. «Порту»нинг рақибларига қарши Теллес ҳар доим жуда яхши ўйин намойиш этган. Энди эса унинг бошқа лигада, бўлганда ҳам кучлироқ лигада ўзини қандай кўрсатишини кузатиш қолди, холос.
Бразилия терма жамоасидаги аҳволи қандай?
Терма жамоадан четда бўлиш футболчининг истеъдодли эмаслигидан ёки бошқалардан кучсизлигидан далолат бермайди. Бунга яққол мисол сифатида «Манчестер Сити»да жавлон ураётган Аймерик Ляпортни кўрсатиш мумкин. Теллес ҳам Ляпорт (Франция терма жамоаси Рафаэл Варан, Самюуэль Умтити марказий ҳимояда асосий ролни ўйнайди) сингари терма жамоадаги ўта кучли рақобатдан азият чекишга мажбур. Шу ўринда 27 ёшни уриб қўйган Теллес терма жамоа борасида омади келмаганига шунчаки кўникиб бўлган.
Ҳа айтганча, Алексда Италия паспорти бор. Демак, унда мазкур юрт бош жамоасида ўйнаш имконияти ҳам. Аммо Италия терма жамоасининг айни дамдаги устози Роберто Манчини «Челси» вакили Эмерсонга ишонч билдирмоқда — ҳозирча. Келажакда ҳамма нарса бўлиши мумкин.
Кучли томонлари
Кучли зарбаларидан ташқари унда рақиб жарима майдонида тажовузкор ҳаракат қилиш билан ҳам ажралиб туради. Теллес тезкор кроссларни амалга оширади. Кутилмаган тезлиги билан ҳайрон қолдириши мумкин. Техникаси юқори, ҳимояда ҳам, ҳужумда ҳам бирдек фойдали. Иккала оёқда ҳам бирдек ўйнай олади. У асосий «қуроли» бўлмаган онг оёғида ҳам зарба беришдан қўрқмайди.
«Барселона» ва «Челси»ни ҳам жалб қилаётган энг асосий сифати эса чидамлилик. У ҳеч қачон чарчаб қолмайди.
Кимга ўхшайди?
Алекс кўпроқ Антонио Конте вақтидаги Маркос Алонсони эслатиб юборади. Рақиб майдонига худди Майкондек кириб боради. Ҳимояда эса Люка Эрнандес ёки Бенжамен Паварни эслатиб юборади. Бироқ уни кимгадир ўхшатиш барибир ихтиёрий. Танлов ўзингизда.
АПЛга тўғри келадими?
Англия Премьер Лигасидаги Португалиядаги каби «Тондела» сингари кучсиз рақиблар деярли йўқ. Аммо бу ҳеҳc нарсани ўзгартира олмайди. Боиси Теллес юқори даражада тўп тепишга 100 фоиз тайёр. Катта эҳтимол Алекс жуда тез вақт оралиғида ўз позициясида энг яхши футболчига айланиши мумкин. АПЛга ҳам Алекс сингари кучли чап қанот ҳимоячилари етишмаётгнаи айни ҳақиқат. Манбалага кўра, Теллеснинг трансфери клубларга 35-40 млн евро атрофида тушиши мумкин. У бунга арзийдими? Албатта!
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)