Londonning ICE birjasida Brent markasidagi neft narxi o‘tgan kungi savdolarga nisbatan 12 foizga qimmatlashdi. Bu haqda birja ma’lumotlarida keltirilgan.
Ma’lumotlarga ko‘ra, Brent markasidagi neftning bir barreli uchun 22,95 dollar taklif qilingan. Bundan oldingi sessiyalar yopilishi vaqtida uning narxi 20,37 dollarni tashkil etgandi.
Avvalroq AQSh prezidenti Donald Tramp Eron patrul katerlari Amerika kemalariga nisbatan provokatsiya uyushtiradigan bo‘lsa, ularga qarata o‘t ochishga buyruq berganini ma’lum qilgandi.
“Men AQSh harbiy dengiz kuchlariga Eronning qurollangan kemalari bizning kemalarimizni taqib qiladigan bo‘lsa, o‘t ochishga va ularni yo‘q qilishga ko‘rsatma berdim”, — deydi Tramp.
Keyinroq Tramp o‘zining Twitter’dagi sahifasiga dengizda sodir bo‘lgan mojarolardan birining videosini joylashtirgan. Unda Eron patrul kemasi Amerika harbiylarining kemasiga yaqinlashayotganini ko‘rish mumkin. “Jo Bayden (prezidentlik saylovlarida Trampga raqobatchi bo‘lishi kutilayotgan nomzod — tahr.) buni normal deb hisoblaydi. Men esa yo‘q”, — deya Amerika yetakchisi izoh qoldirgan.
Shuningdek, Donald Tramp Amerika neft kompaniyalariga moddiy yordam ko‘rsatishga va’da bergan.
Eslatib o‘tamiz, 20-aprel kuni Amerikaning WTI markadagi neftining may oyi uchun fyuchers narxi barrel uchun 40 dollarga pastladi. Kotirovkalarning qulashi neft saqlash joylarining to‘lib qolgani bilan bog‘liq. 22-aprel kuni esa WTI qiymatining qulashi ortidan Brent va Urals markalaridagi neft narxi ham keskin pastlagan edi. Brent neftining narxi 18 yil ichida birinchi marta 19 dollardan pastga tushib ketdi.
Izoh (0)