Shu yilning 19-aprelidan boshlab shaxsiy himoya kiyimi, tibbiy qo‘lqop va niqobsiz “dostavka” xizmatini amalga oshirganlar ma’muriy javobgarlikka tortiladi. Bu haqda 21-aprel kuni AOKA shtabida Ichki ishlar vazirligi axborot xizmati rahbari Shohruh G‘iyosov ishtirokida bo‘lib o‘tgan brifingda ma’lum qilindi.
G‘iyosovning aytishicha, shu yilning 19-aprelidan boshlab shaxsiy himoya kiyimi, tibbiy qo‘lqop va niqobsiz “dostavka” xizmatini amalga oshirganlarga nisbatan ma’muriy javobgarlik chorasi qo‘llaniladi.
“Fuqarolarning xavfli yuqumli kasalliklarga chalinishining oldini olish va sanitariya-epidemiologik xavfsizligini ta’minlash maqsadida joriy yilning 19-aprel kunidan boshlab yangi tartib yo‘lga qo‘yildi. Endilikda Toshkent va Nukus shaharlari, viloyatlar markazlari, shuningdek, Toshkent viloyatining Angren, Bekobod, Olmaliq, Chirchiq va Yangiyo‘l shaharlari hududida yo‘lovchi tashish faoliyati bilan shug‘ullanish litsenziyasiga ega bo‘lgan yo‘nalishsiz taksilarga oziq-ovqat, dori-darmon, tibbiy buyum va vositalar kabi zarur mahsulotlarni yetkazib berish xizmatini amalga oshirish jarayonida maxsus kombinezon (shaxsiy himoya kiyimi), tibbiy qo‘lqop va niqoblarda faoliyat olib borishlari lozimligi belgilandi.
Mazkur qoidaga amal qilmaslik, O‘zbekiston Respublikasi Ma’muriy javobgarlik to‘g‘risidagi kodeksning 54-moddasiga (epidemiyalarga qarshi kurash qoidalarini buzish) muvofiq ma’muriy javobgarlikni keltirib chiqaradi”, — dedi Shoxruh G‘iyosov.
Vazirlik rasmiysining ta’kidlashicha, maxsus kombinezonlar sotuvi internet-savdo tarmoqlarida yo‘lga qo‘yilgan.
Izoh (0)