Шу йилнинг 19 апрелидан бошлаб шахсий ҳимоя кийими, тиббий қўлқоп ва ниқобсиз «доставка» хизматини амалга оширганлар маъмурий жавобгарликка тортилади. Бу ҳақда 21 апрель куни АОКА штабида Ички ишлар вазирлиги ахборот хизмати раҳбари Шоҳруҳ Ғиёсов иштирокида бўлиб ўтган брифингда маълум қилинди.
Ғиёсовнинг айтишича, шу йилнинг 19 апрелидан бошлаб шахсий ҳимоя кийими, тиббий қўлқоп ва ниқобсиз «доставка» хизматини амалга оширганларга нисбатан маъмурий жавобгарлик чораси қўлланилади.
«Фуқароларнинг хавфли юқумли касалликларга чалинишининг олдини олиш ва санитария-эпидемиологик хавфсизлигини таъминлаш мақсадида жорий йилнинг 19 апрель кунидан бошлаб янги тартиб йўлга қўйилди. Эндиликда Тошкент ва Нукус шаҳарлари, вилоятлар марказлари, шунингдек, Тошкент вилоятининг Ангрен, Бекобод, Олмалиқ, Чирчиқ ва Янгийўл шаҳарлари ҳудудида йўловчи ташиш фаолияти билан шуғулланиш лицензиясига эга бўлган йўналишсиз таксиларга озиқ-овқат, дори-дармон, тиббий буюм ва воситалар каби зарур маҳсулотларни етказиб бериш хизматини амалга ошириш жараёнида махсус комбинезон (шахсий ҳимоя кийими), тиббий қўлқоп ва ниқобларда фаолият олиб боришлари лозимлиги белгиланди.
Мазкур қоидага амал қилмаслик, Ўзбекистон Республикаси Маъмурий жавобгарлик тўғрисидаги кодекснинг 54-моддасига (эпидемияларга қарши кураш қоидаларини бузиш) мувофиқ маъмурий жавобгарликни келтириб чиқаради», — деди Шохруҳ Ғиёсов.
Вазирлик расмийсининг таъкидлашича, махсус комбинезонлар сотуви интернет-савдо тармоқларида йўлга қўйилган.
Изоҳ (0)