Qamashi tuman hokimligi “Qo‘shkapa” mahallasida 7 ming aholiga xizmat ko‘rsatayotgan ko‘prik ta’miridan voz kechganini bildirdi. Hokimlikka ko‘ra ko‘prik ta’miri kutilgan natijani bermaydi. Shu boisdan ham tuman hokimligi va viloyat rahbariyati ta’mirlash ishlarini boshlamagan.
“Ushbu ko‘prik bir necha oydan buyon mahalliy aholini tashvishga solib kelayotgani rost. ‘Qo‘shkapa’da joylashgan ushbu ko‘prikni dastlab ta’mirlash rejalashtirilgan edi. ‘Ravshan zar’ sho‘ba xo‘jalik jamiyati bilan 420 million so‘mlik shartnoma ham tuzilgandi. Biroq ish jarayonida ma’lum bo‘ldiki, ushbu ko‘prikni ta’mirlash kutilgan natijani bermas ekan. Yangi loyiha asosida yangi ko‘prik qurilishi kerak degan xulosaga kelindi. Ko‘pchilikni ko‘prikning keyingi taqdiri qanday bo‘lishi qiziqtiradi. Shaxsan men uchun ham ko‘prikning mustahkam, zamonaviy bo‘lishi juda muhim”, — deydi ushbu holatga aniqlik kiritib, Qamashi tumani hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Qurbon Haydarov.
Hozirda viloyat hokimligi tomonidan Vazirlar Mahkamasiga inqirozga qarshi kurashish jamg‘armasi hisobidan Qamashi tumani “Qo‘shkapa” mahalla fuqarolar yig‘inidagi ko‘prikni qayta qurish taklifi berilgani ma’lum qilindi.
“Shuningdek, taklifda 1 milliard 575 million so‘mlik loyiha nazarda tutilgan”, — deyiladi Qamashi tumani hokimligi axborot xizmati ma’lumotida.
Eslatib o‘tamiz, mazkur ko‘prik betoni 2019-yilning sentabr oyida siljib, foydalanish uchun xavfli holatga kelgani uchun bir oyga yopilgan edi. Qamashi hokimi o‘rinbosari esa ko‘prik tez orada ta’mirlanishini aytgandi. Viloyat hokimligi ko‘prik ta’miri uchun kamida 400 million so‘m ajratilishini e’lon qilgan edi.
Mavzuga doir:
Izoh (0)