Toshkent viloyati Yangiyo‘l shahrida 15-aprel, chorshanba kuni, tunda miltiq ko‘tarib yurgan va daydi itlarni otayotgan shaxslar haqida xabar tarqalgandi.
Toshkent viloyati IIBB Jinoyat qidiruv bo‘limi va Yangiyo‘l shahar IIB Jinoyat qidiruv bo‘limi xodimlari tomonidan olib borilgan tezkor surishtiruv ishlari davomida ushbu notanish kishilar Yangiyo‘l shahrida yashovchi 1976-yilda tug‘ilgan D.S., 1982-yilda tug‘ilgan A.X. va 1983-yilda tug‘ilgan A.K. ekanligi aniqlangandi.
Oliy sud matbuot xizmatining “Daryo”ga ma’lum qilishicha, ularga sud hukmi e’lon qilindi.
Ma’lum bo‘lishicha, 14-aprel, seshanba kuni, soat 21:00 larda D.S. qo‘shnilari A.X. va A.K. bilan birga kasalliklar tarqalishining oldini olish maqsadida belgilangan karantin qoidalarini buzib, Yangiyo‘l shahar Navro‘z dahasi hududida 2 dona Hatsan Striker nomli sport pnevmatik miltig‘ini olib yurib, jamiyatda yurish-turish qoidalarini qasddan mensimasdan, ushbu tir miltiqlari bilan it ovlab, jamoat tartibini va fuqarolarning osoyishtaligini buzib, mayda bezorilik sodir qilgan.
Ular suhbat jarayonida o‘zlariga tegishli bo‘lgan sport pnevmatik (tir) miltiqlarini Toshkent shahridagi “Dinamo” sport do‘konidan hujjatlar asosida rasmiylashtirib olganligini va karantin davrida yosh bolalari uyda bo‘lganligi sababli xavfsizlik yuzasidan ushbu qurollarni tanishi “Ulug‘bek” ismli shaxsning uyiga olib ketayotganligini va jonivorlarga qarata o‘q otmaganligini bildirgan.
18-aprel, shanba kuni, Toshkent viloyati Yangiyo‘l shahar ma’muriy sudi sud ishida D.S, A.X. va A.K. Ma’muriy javobgarlik to‘g‘risidagi kodeksning 183-moddasi (Mayda bezorilik), 54-moddasi 2-qismi (Karantinli va inson uchun xavfli bo‘lgan boshqa yuqumli kasalliklar paydo bo‘lishining yoki tarqalishining oldini olish maqsadida belgilangan majburiy qoidalarni buzish) bilan aybli deb topilgan.
Ma’muriy javobgarlik to‘g‘risidagi kodeksning 34-moddasi (Bir necha huquqbuzarlikni sodir etganlik uchun ma’muriy jazo qo‘llanish)ga asosan, D.S. va A.X. ga 15 sutkadan, A.K.ga 5 sutka ma’muriy qamoq, shuningdek, ularning har biriga 4 million 460 ming so‘m jarima jazosi tayinlangan.
Ashyoviy dalil sifatida olinib, ma’muriy ishga ilova qilingan ikki dona Hatsan Striker nomli sport pnevmatik miltig‘ini esa yo‘q qilish belgilangan.
Izoh (0)