Harbiy xizmatni o‘tash yoshiga yetgan fuqarolar karantindan so‘ng xizmatga chaqirilishi mumkinligi aytildi

Bu haqda 20-aprel, dushanba kuni, AOKA shtabida Mudofaa vazirligi axborot xizmati rahbari Bahrom Zulfiqorov ishtirokida bo‘lib o‘tgan brifingda xabar berildi.

Fuqarodan kelib tushgan savolda bir oylik harbiy xizmatni o‘tamoqchi bo‘lgan shaxslar aprel oyida 27 yoshga to‘lsa, pandemiya sababli ularga keyinroq harbiy xizmatni o‘tash uchun imkon yaratilishi masalasi so‘ralgan.

Mudofaa vazirligi vakili ushbu 27 yoshdagi shaxslar karantin tadbirlari yakunlangach muddatli harbiy xizmat yoki safarbarlik chaqiruvi rezerviga chaqirilishda davom etishi mumkinligini bildirgan. Ayni paytda mazkur masala bo‘yicha ishlar olib borilayotgani aytildi.

“Bu masala ko‘rib chiqilib, qaror qabul qilingandan so‘ng uning natijalari joylardagi mudofaa ishlari bo‘limlari orqali fuqarolarga yetkaziladi”, — deydi Bahrom Zulfiqorov.

Avvalroq Mudofaa vazirligi bir oylik xizmatga pulini to‘lab qo‘ygan fuqarolarning pullari qaytarib berilmasligini ma’lum qilgan edi. Shuningdek, O‘zbekistonda harbiy xizmat uchun o‘tkazilgan tibbiy ko‘rik natijalari 3 oygacha o‘z kuchida qolishi, muddat o‘tgan hollarda fuqarolar karantin tugaganidan so‘ng qaytadan tibbiy ko‘rikka murojaat qilishi ta’kidlandi.