Farg‘ona viloyatida karantin qoidalarini buzib, jamoat joyida niqobsiz va mast holda yurgan fuqaroga sud tomonidan 15 sutka ma’muriy qamoq jazosi tayinlandi, — deb xabar bermoqda “Daryo” muxbiri Azizjon Ermatov.
Ma’lum bo‘lishicha, joriy yil 14-aprel kuni O‘zbekiston tumani Yaypan shahridagi dehqon bozori hududida karantin qoidalariga amal qilmasdan niqobsiz yurgani uchun fuqaro O.J. IIB xodimlari tomonidan ogohlantirilgan. Shunga qaramasdan O.J. ichki ishlar xodimining qonuniy talabini bajarmasdan, jamoat joyida mast holda mayda bezorilik qilgan. Qoidabuzarlik bo‘yicha O.J.ga nisbatan ma’muriy bayonnoma rasmiylashtirilib, sudga oshirilgan.
O‘zbeksiton tuman ma’muriy sudining 15-apreldagi qaroriga ko‘ra, O.J. Ma’muriy javobgarlik to‘g‘risidagi kodeksning 54-moddasi 1-qismi (Epidemiyalarga qarshi kurash qoidalarini buzish), 183-moddasi (Mayda bezorilik), 194-moddasi (Ichki ishlar organlari xodimining qonuniy talablarini bajarmaslik) 1-qismi bilan aybli deb topilib, unga 15 sutka qamoq jazosi tayinlangan.
Shuningdek, O.J.dan 468 ming 300 so‘m miqdorida qamoqda saqlash xarajatlari undirilishi belgilandi.
Izoh (0)