Prezident Shavkat Mirziyoyev 17-aprel, juma kuni, koronavirus pandemiyasiga qarshi kurashishda xalqaro moliya institutlari bilan hamkorlikni kuchaytirish masalalari muhokamasiga bag‘ishlangan yig‘ilish o‘tkazdi, deb xabar bermoqda Prezident matbuot xizmati.
2020-yilda xalqaro va xorijiy moliya institutlari tomonidan yo‘naltirilgan 2,7 milliard dollarni o‘zlashtirish rejalashtirilgan. Ularning asosiy qismi Osiyo taraqqiyot banki, Jahon banki va Yaponiya xalqaro hamkorlik agentligi (JICA) hissasiga to‘g‘ri keladi.
Hozirgi vaziyatdan kelib chiqib, amaldagi loyihalarni optimallashtirgan holda mablag‘lar birinchi o‘rinda tibbiyot sohasiga yo‘naltirilmoqda. Xalqaro tashkilotlar bu borada O‘zbekistonga ko‘maklashish va mablag‘ ajratishga tayyor ekanini bildirmoqda.
Yig‘ilishda xalqaro moliya institutlari pandemiya bilan kurash uchun sog‘liqni saqlash sohasiga ajratayotgan 277 million dollar miqdoridagi mablag‘larni tez fursatlarda va samarali o‘zlashtirish lozimligi ta’kidlandi.
Islom taraqqiyot banki bilan kelishib, Toshkent viloyati Zangiota tumanida qurilayotgan shifoxona va Yuqori Chirchiq tumanidagi karantin hududini zamonaviy tibbiy texnikalar bilan jihozlash bo‘yicha topshiriqlar berildi.
Sog‘liqni saqlash vazirligiga birlamchi va tibbiy yordam loyihalari doirasida Osiyo taraqqiyot banki hamda Jahon bankining 30 million dollar mablag‘i evaziga o‘pkani sun’iy ventilyatsiya qiluvchi 2 ming 300 ta apparat va boshqa uskunalar sotib olish vazifasi qo‘yildi.
Osiyo infratuzilma investitsiyalari banki va Jahon bankidan qo‘shimcha mablag‘lar jalb etib, tibbiy va ijtimoiy sohalarga yo‘naltirish bo‘yicha ko‘rsatma berildi.
Pandemiya sharoitida tadbirkorlik, kichik va o‘rta biznesni qo‘llab-quvvatlash uchun 700 million dollar jalb qilish ko‘zda tutilmoqda.
Shavkat Mirziyoyev bu mablag‘larni, birinchi navbatda, meva-sabzavotchilik, oziq-ovqat sanoati va eksportni rag‘batlantirishga yo‘naltirish zarurligini ta’kidladi.
Mavzuga doir:
- Shavkat Mirziyoyev: “Xavf hali o‘tib ketgani yo‘q. Hali oldinda juda katta sinovlar kutmoqda”
- Shavkat Mirziyoyev karantin davrida uyda rivojlantirish mumkin bo‘lgan faoliyat turlari qo‘llab-quvvatlanishini ma’lum qildi
- “Bitta korxona faoliyatini to‘xtatishiga ham ‘favqulodda holat’ deb qaralishi kerak” — Shavkat Mirziyoyev
Yig‘ilishda shu masalaga ham alohida e’tibor qaratilib, mutasaddilarga tegishli ko‘rsatmalar berildi. Koronavirus pandemiyasiga qarshi kurashish chora-tadbirlari uchun donor tashkilotlar bilan qo‘shimcha grant kelishuvlari imzolash muhimligi qayd etildi.
Xalqaro moliya institutlari mablag‘larini jalb qilishni jadallashtirish va o‘z vaqtida o‘zlashtirish bo‘yicha vazifalar belgilandi.
Mavzuga doir:
- Shavkat Mirziyoyev videokonferensaloqa orqali Zangiota tumanidagi farmatsevtika klasteri qurilishini boshlab berdi
- “Karantinni qachon bekor qilishni xalqimiz bilan bamaslahat, har tomonlama chuqur o‘ylab, albatta, ko‘rib chiqamiz” — Shavkat Mirziyoyev
- Shavkat Mirziyoyev: “Hokimlar va sektor rahbarlari kam ta’minlangan oilalarni qo‘llab-quvvatlash ishlariga shaxsan javob beradi”
Izoh (0)