Ichki ishlar vazirligi TATU talabalari, Yoshlar Ittifoqi va yosh volontyorlar orasida “vatanparvar blogerlar” guruhini tuzish taklif qilingan Prezident qarori loyihasini jamoatchilik muhokamasiga qo‘ydi.
Yoshlar Ittifoqi markaziy kengashi raisi Alisher Sa’dullayev tashkiloti ushbu loyihaning ishlab chiqilishiga aloqasi yo‘qligini bildirgan va shu sababli qarordagi bandda Yoshlar Ittifoqini olib tashlashni so‘ragan.
Yoshlar Ittifoqi axborot xizmatining xabar berishicha, mazkur hujjatga Yoshlar Ittifoqi aloqador emas. Uni o‘rganish uchun tashkilotga yuborilganida aynan shu punktdagi taklifga o‘z munosabatini bildirib, keskin qarshiligini bayon qilgan.
O‘zbekiston IIV muhokamaga qo‘yilgan qaror loyihasi bilan tasdiqlanadigan “Yo‘l xaritasi”da O‘zbekiston Yoshlar Ittifoqi a’zolari, Toshkent axborot texnologiyalari universiteti talabalari va ko‘ngilli yoshlar ishtirokida “vatanparvar blogerlar” virtual guruhini tashkil etish belgilangan.
Ular yordamida ijtimoiy tarmoqlardagi salbiy fikrlarni aniqlash hamda tarmoq foydalanuvchilarini ularning ta’sir doirasiga tushib qolishlarining oldini olish maqsadida bildirilayotgan salbiy fikrlarga murosasizlik muhitini yaratish vazifasi bajarilishi ko‘zda tutilgan.
Virtual guruh tuzish “Yo‘l xaritasi”ning 9-bandida belgilgangan va chora-tadbirlar dasturi 2020—2022-yillar uchun mo‘ljallangan.
“Gazeta.uz” nashrining Yoshlat Ittifoqi markaziy kengashi raisi Alisher Sa’dullayevning izohiga asoslanib yozishicha, uning rahbarligidagi tashkilot ushbu loyihaning ishlab chiqilishida ishtirok etmagan. Sa’dullayevning so‘zlariga ko‘ra, Yoshlar Ittifoqi ushbu banddan tashkilot nomi olib tashlanishini talab qilmoqda.
“Mazkur taklif va tavsiyalar asosida hujjat loyihasi o‘rnatilgan tartibda qayta ko‘rib chiqiladi va kelishish uchun mutasaddi idoralarga kiritiladi,” — deyiladi IIV axborot xizmati xabarida.
Qaror loyihasida O‘zbekiston Respublikasi Ichki ishlar vazirligi Huquqbuzarliklar profilaktikasi bosh boshqarmasi huzurida Voyaga yetmaganlar va yoshlar o‘rtasida huquqbuzarliklar profilaktikasi faoliyatini muvofiqlashtirish boshqarmasi tashkil etish va voyaga yetmaganlar hamda yoshlar o‘rtasida huquqbuzarliklar profilaktikasi faoliyatini muvofiqlashtirish boshqarmasining asosiy vazifalari etib quyidagilarni belgilash ko‘zda tutilgan:
- voyaga yetmaganlar va yoshlar o‘rtasida huquqbuzarliklarning barvaqt oldini olish ishlarini muvofiqlashtirish va uslubiy rahbarlik qilish;
- ichki ishlar organlari sohaviy xizmatlarining voyaga yetmaganlar va yoshlar bilan ishlash bo‘linmalari faoliyatini samarali tashkil etish;
- “ta’lim muassasasi—oila—mahalla” hamkorlik tizimini mutasaddi idoralar va tashkilotlar bilan samarali hamkorlikda amalga oshirilishini ta’minlash;
- voyaga yetmaganlar va yoshlar o‘rtasida huquqbuzarliklar profilaktikasining innovatsion shakl va usullarini joriy etish, faoliyatni tashkil etishda ichki ishlar organlarining davlat organlari va jamoatchilik bilan o‘zaro hamkorligining ta’sirchan mexanizmlarini joriy etish, ushbu tizimni rivojlantirish bo‘yicha qisqa, o‘rta va uzoq muddatli strategik dasturlarni ishlab chiqish.
Izoh (0)