Farg‘ona viloyat yuqumli kasalliklar shifoxonasidan koronavirus infeksiyasiga chalingan ikki nafar bemor butunlay sog‘aydi. Sog‘liqni saqlash vazirligidan ma’lum qilishlaricha, bemorlar 13-aprel, dushanba kuni, viloyat sog‘liqni saqlash boshqarmasi mas’ullari ishtirokida reabilitatsiyaga kuzatilgan.
Tuzalganlardan biri (ayol) Andijon viloyatidan, ikkinchisi (ayol) esa Toshkent viloyatidan bo‘lib, 25-mart kuni Turkiyadan Farg‘onaga charter reys bilan kelgan va karantinga olingan edi. Ularda 27-mart kuni koronavirus infeksiyasi tasdiqlangan.
“Ushbu bemorlar shifokorlar tomondan xalqaro standartlar asosida olib borilgan to‘g‘ri davolash muolajalari tufayli ayni paytda darddan to‘liq forig‘ bo‘lishdi”, — deyiladi Sog‘liqni saqlash vazirligi axborotida.
Avvalroq 13-aprel kuni Qashqadaryo viloyatida ham koronavirusga chalingan chiroqchilik 56 yoshli erkak va 8 yoshli bola kasallikdan sog‘aygani ma’lum qilingan edi. Shunday qilib, O‘zbekistonda koronavirusdan sog‘ayganlar soni 70 nafarga yetdi.
Ma’lumot uchun, O‘zbekistonda koronavirus infeksiyasi ilk bor tasdiqlanganidan beri (15-martdan buyon) kasallanganlar soni 896 kishiga yetdi, ularning to‘rt nafari kasallik oqibatida vafot etgan.
Izoh (0)