Amsterdamdagi sirk shousi chog‘ida 10 metrli balandlikdan qulagan o‘zbekistonlik havo gimnastikachisi Kristina Vorobyova sog‘aymoqda. Biroq salomatligining to‘liq tiklanishi uchun yana ikki yil kerak bo‘ladi. Bu haqda uning fizioterapevti bergan ma’lumotlarga asoslanib, Hart van Nederland xabar berdi.
Akrobatning fizioterapevti Mireyl Pontning ma’lum qilishicha, uning reabilitatsiyasi juda intensiv o‘tdi. Shifoxonaga kelganida u hech narsa qila olmas edi. U faqat oyoqlarini qimirlata olardi. Kristina Vorobyova aprel oyi oxirida qo‘ltiqtayoq yordamida yura olishi kutilmoqda. Oxir-oqibat bemor yordamsiz yura olishi mumkin bo‘ladi, ammo to‘liq tiklanishi uchun yana ikki yil kerak.
Akrobatning yana chiqish qila olishi masalasida Mireyl Pont “u dunyo miqyosidagi havo gimnastikachisi edi. O‘sha darajaga qaytishi men uchun imkonsiz ko‘rinadi, ammo kim biladi, u bizni hayratga solishi mumkin”, deb ta’kidlagan.
Eslatib o‘tamiz, o‘zbekistonlik akrobatlar Kristina Vorobyova va Rustam Osmanov 2020-yilning 3-yanvar kuni Amsterdamdagi Karre teatridagi o‘zining Sky Angels (“Osmon farishtalari”) duet chiqishi paytida 10 metr balandlikdan qulab tushgan edi. Vorobyova orqa tomoni bilan yiqilib, jiddiy jarohat olgan. Uning jufti Rustam Osmanov esa yengilroq jarohat olgan edi. Mazkur vaziyat yuzasidan O‘zbekiston Tashqi ishlar vazirligi va Madaniyat vazirligi ma’lumot bergandi. Keyinroq Kristina Vorobyovaning o‘zi ahvoli haqida xabar bergandi, u bir nechta marta operatsiya qilindi.
Izoh (0)