Ички ишлар вазирлиги ТАТУ талабалари, Ёшлар Иттифоқи ва ёш волонтёрлар орасида «ватанпарвар блогерлар» гуруҳини тузиш таклиф қилинган Президент қарори лойиҳасини жамоатчилик муҳокамасига қўйди.
Ёшлар Иттифоқи марказий кенгаши раиси Алишер Саъдуллаев ташкилоти ушбу лойиҳанинг ишлаб чиқилишига алоқаси йўқлигини билдирган ва шу сабабли қарордаги бандда Ёшлар Иттифоқини олиб ташлашни сўраган.
Ёшлар Иттифоқи ахборот хизматининг хабар беришича, мазкур ҳужжатга Ёшлар Иттифоқи алоқадор эмас. Уни ўрганиш учун ташкилотга юборилганида айнан шу пунктдаги таклифга ўз муносабатини билдириб, кескин қаршилигини баён қилган.
Ўзбекистон ИИВ муҳокамага қўйилган қарор лойиҳаси билан тасдиқланадиган «Йўл харитаси»да Ўзбекистон Ёшлар Иттифоқи аъзолари, Тошкент ахборот технологиялари университети талабалари ва кўнгилли ёшлар иштирокида «ватанпарвар блогерлар» виртуал гуруҳини ташкил этиш белгиланган.
Улар ёрдамида ижтимоий тармоқлардаги салбий фикрларни аниқлаш ҳамда тармоқ фойдаланувчиларини уларнинг таъсир доирасига тушиб қолишларининг олдини олиш мақсадида билдирилаётган салбий фикрларга муросасизлик муҳитини яратиш вазифаси бажарилиши кўзда тутилган.
Виртуал гуруҳ тузиш «Йўл харитаси»нинг 9-бандида белгилганган ва чора-тадбирлар дастури 2020—2022 йиллар учун мўлжалланган.
«Gazeta.uz» нашрининг Ёшлат Иттифоқи марказий кенгаши раиси Алишер Саъдуллаевнинг изоҳига асосланиб ёзишича, унинг раҳбарлигидаги ташкилот ушбу лойиҳанинг ишлаб чиқилишида иштирок этмаган. Саъдуллаевнинг сўзларига кўра, Ёшлар Иттифоқи ушбу банддан ташкилот номи олиб ташланишини талаб қилмоқда.
«Мазкур таклиф ва тавсиялар асосида ҳужжат лойиҳаси ўрнатилган тартибда қайта кўриб чиқилади ва келишиш учун мутасадди идораларга киритилади,» — дейилади ИИВ ахборот хизмати хабарида.
Қарор лойиҳасида Ўзбекистон Республикаси Ички ишлар вазирлиги Ҳуқуқбузарликлар профилактикаси бош бошқармаси ҳузурида Вояга етмаганлар ва ёшлар ўртасида ҳуқуқбузарликлар профилактикаси фаолиятини мувофиқлаштириш бошқармаси ташкил этиш ва вояга етмаганлар ҳамда ёшлар ўртасида ҳуқуқбузарликлар профилактикаси фаолиятини мувофиқлаштириш бошқармасининг асосий вазифалари этиб қуйидагиларни белгилаш кўзда тутилган:
- вояга етмаганлар ва ёшлар ўртасида ҳуқуқбузарликларнинг барвақт олдини олиш ишларини мувофиқлаштириш ва услубий раҳбарлик қилиш;
- ички ишлар органлари соҳавий хизматларининг вояга етмаганлар ва ёшлар билан ишлаш бўлинмалари фаолиятини самарали ташкил этиш;
- «таълим муассасаси—оила—маҳалла» ҳамкорлик тизимини мутасадди идоралар ва ташкилотлар билан самарали ҳамкорликда амалга оширилишини таъминлаш;
- вояга етмаганлар ва ёшлар ўртасида ҳуқуқбузарликлар профилактикасининг инновацион шакл ва усулларини жорий этиш, фаолиятни ташкил этишда ички ишлар органларининг давлат органлари ва жамоатчилик билан ўзаро ҳамкорлигининг таъсирчан механизмларини жорий этиш, ушбу тизимни ривожлантириш бўйича қисқа, ўрта ва узоқ муддатли стратегик дастурларни ишлаб чиқиш.
Изоҳ (0)