Фарғона вилоят юқумли касалликлар шифохонасидан коронавирус инфекциясига чалинган икки нафар бемор бутунлай соғайди. Соғлиқни сақлаш вазирлигидан маълум қилишларича, беморлар 13 апрель, душанба куни, вилоят соғлиқни сақлаш бошқармаси масъуллари иштирокида реабилитацияга кузатилган.
Тузалганлардан бири (аёл) Андижон вилоятидан, иккинчиси (аёл) эса Тошкент вилоятидан бўлиб, 25 март куни Туркиядан Фарғонага чартер рейс билан келган ва карантинга олинган эди. Уларда 27 март куни коронавирус инфекцияси тасдиқланган.
«Ушбу беморлар шифокорлар томондан халқаро стандартлар асосида олиб борилган тўғри даволаш муолажалари туфайли айни пайтда дарддан тўлиқ фориғ бўлишди», — дейилади Соғлиқни сақлаш вазирлиги ахборотида.
Аввалроқ 13 апрель куни Қашқадарё вилоятида ҳам коронавирусга чалинган чироқчилик 56 ёшли эркак ва 8 ёшли бола касалликдан соғайгани маълум қилинган эди. Шундай қилиб, Ўзбекистонда коронавирусдан соғайганлар сони 70 нафарга етди.
Маълумот учун, Ўзбекистонда коронавирус инфекцияси илк бор тасдиқланганидан бери (15 мартдан буён) касалланганлар сони 896 кишига етди, уларнинг тўрт нафари касаллик оқибатида вафот этган.
Изоҳ (0)