O‘zbekistonga koronavirusga qarshi kurashda yordam berish uchun Janubiy Koreyadan yana bir mutaxassis keladi

Aprel oyida Janubiy Koreyadan yana bir tajribali mutaxassis O‘zbekistonga kelishi kutilmoqda. Bu haqda Prezident matbuot xizmati ma’lum qildi.

Prezident Shavkat Mirziyoyev 13-aprel kuni Janubiy Koreya prezidenti Mun Chje In bilan telefon orqali muloqot qildi. Suhbatda koronavirus infeksiyasining tarqalishiga qarshi kurashishda hamkorlikni davom ettirish va sa’y-harakatlarni birlashtirishga alohida e’tibor qaratilgan.

Avvalroq mart oyining oxiridan O‘zbekistonda koreyalik professor — epidemiolog Soy Chje Uk mutaxassis faol ishlayotgani, bilim va ko‘nikmalari bilan o‘rtoqlashayotgani haqida xabar berilgan edi. “Shu oyda mazkur diyordan yurtimizga yana bir tajribali mutaxassis – anesteziolog-reanimatologning kelishi kutilmoqda”, — deyiladi Prezident matbuot xizmati axborotida.

Prezidentlar ikki mamlakat o‘rtasida amaliy hamkorlikni kengaytirishga hamda O‘zbekistonda Koreya tibbiyotining, shu jumladan karantin tadbirlarini tashkil etish, kasalliklarni aniqlash va davolash, reabilitatsiya tadbirlarini o‘tkazish, tibbiy kadrlar malakasini oshirish borasidagi ilg‘or tajribasini samarali joriy etishga qat’iy intilishlarini qayd etgan.

Ikki davlat sog‘liqni saqlash vazirliklari va yetakchi tibbiyot markazlari o‘rtasida sa’y-harakatlarni yaqindan muvofiqlashtirish va tezkor hamkorlikni yo‘lga qo‘yishga kelishib olingan. Qo‘shimcha qilishlaricha, Prezident Shavkat Mirziyoyev pandemiyaga qarshi kurashda ko‘rsatilayotgan amaliy ko‘mak uchun Janubiy Koreya prezidenti Mun Chje Inga samimiy minnatdorlik bildirgan.

Telefon muloqoti yakunida prezident Mun Chje In Janubiy Koreya birodar O‘zbekistonga bugun dolzarb bo‘lib turgan qiyinchiliklar va zamonaviy xatarlarni tez fursatlarda yengib o‘tishda barcha zarur yordam va ko‘makni ko‘rsatishga tayyor ekanini yana bir bor bildirgan.

Avvalroq yaqin vaqt ichida koronavirusga qarshi kurash bo‘yicha xitoylik mutaxassislar O‘zbekistonga kelishi ma’lum qilingan edi.