O‘zbekistonda karantin vaqti itlarni kuniga bir martadan ortiq sayr qildirish taqiqlandi. Kinologlar federatsiyasi bu cheklovni qayta ko‘rib chiqishni so‘radi

O‘zbekistonda koronavirusga qarshi kurash bo‘yicha Respublika maxsus komissiyasi qarori bilan karantin vaqtida uy hayvonlarini uydan qancha masofada sayr qildirish mumkinligi belgilandi.

Qarorga ko‘ra, Toshkent va Nukus shaharlari hamda viloyatlar markazlarida uy hayvonlari (uy itlari)ni uydan 100 metr atrofida, kuniga bir marta sayr qildirishga ruxsat berildi. Avvalroq Ichki ishlar vazirligi matbuot kotibi Shohruh G‘iyosov uy itlarini sayr qildirishda tumshuqbog‘ taqish zarurligi hamda ularning axlatini tozalash kerakligini ma’lum qilgan edi.

O‘z navbatida, O‘zbekiston kinologiya federatsiyasi, karantin davrida koronavirus infeksiyasining tarqalib ketishini oldini olish maqsadida ko‘rilayotgan choralarni to‘g‘ri tushunishini bildirgani holda, uy itlariga doir cheklovni qayta ko‘rib chiqishni, itlarni kuniga bir emas, ikki marta aylantirishga olib chiqishga ruxsat berishni so‘ragan. Shuningdek, ruxsat etilgan sayr masofasi ham 100 metrdan 200 metrgacha oshirilsa, maqsadga muvofiq.

“Ushbu cheklovda itlarning ovqat hazm qilish tizimi faoliyatining jismoniy o‘ziga xosliklarini inobatga olinmagan. Sayr — bu it egasining erkaligi emas, balki zarurat. Voyaga yetgan it kuniga kamiga ikki marta, kuchuklar esa kuniga uch-to‘rt marta sayrga olib chiqilishi kerak. E’tiborlisi, voyaga yetgan it uchun sayrlar orasidagi vaqt 12 soatdan oshib ketmasligi lozim — itlar bundan ortig‘iga jismoniy sabablarga ko‘ra bardosh bera olmaydi. Itni 12 soatdan ko‘proq chidashga majbur qilish unga shafqatsizlarcha munosabatda bo‘lish bilan teng”, — deyiladi federatsiya raisi Hakimjonovaning ochiq murojaatida.

Eslatib o‘tamiz, Nukus va Toshkent shaharlari hamda viloyatlar markazlarida “o‘zini yakkalash” tartibi 6-apreldan majburiy tartibda joriy etildi, mazkur hududlarda 6-apreldan mototransport va velosipedda harakatlanish cheklandi.