“Zudlik bilan O‘zbekistonga bormasak bo‘lmaydi”. Birinchi marta o‘zbek taomlarini ta’tib ko‘rgan italiyaliklar hayratda (video)

Kuzno Productions YouTube kanali olti nafar italiyalikni o‘zbek taomlari bilan mehmon qildi hamda ularning o‘zbek oshxonasi haqidagi fikrlari bilan qiziqdi.

Uch nafar juftlikka o‘zbek milliy taomlaridan avval O‘zbekiston haqida hikoya qilib berildi. Ushbu mamlakat Buyuk Ipak yo‘lida joylashgani hamda bu yerda yilning 300 kunida quyosh charaqlab turishi ma’lumot sifatida keltirildi. “O‘zbekistonning tabiati juda rang-barang. Bu yerda Qizilqum sahrosi, Tyan-Shan tog‘lari, cheksiz cho‘llar va vodiylar mavjud”, — deydi tarjimon.

Italiyalik ayol tarjimondan “Samarqand O‘zbekistonda joylashganmi?” deb so‘radi. Shunda uning hamrohi unga “Sen bu shahar haqida qayerdan bilasan?” deb savol berdi. Shunda ayol Roberto Vechchionining “Samarcanda” qo‘shig‘ini xirgoyi qilib beradi hamda “Men bu shaharga borishni xohlayman” deydi.

Shundan so‘ng italiyaliklarga O‘zbekiston ramzlaridan biri do‘ppi tanishtirildi.

Italiyaliklar osh, lag‘mon, manti, qurut, holva va novvotni tatib ko‘radi. Barcha o‘zbek taomlari va shirinliklar ularga manzur bo‘lgan. “Hammamiz zudlik bilan O‘zbekistonga borishimiz kerak”, “Bu taomlarning mazasini unutib bo‘lmaydi!”, “Nega bu taomlarni oldinroq tatib ko‘rmadik?” deydi italiyaliklar.