Kuzno Productions YouTube канали олти нафар италияликни ўзбек таомлари билан меҳмон қилди ҳамда уларнинг ўзбек ошхонаси ҳақидаги фикрлари билан қизиқди.
Уч нафар жуфтликка ўзбек миллий таомларидан аввал Ўзбекистон ҳақида ҳикоя қилиб берилди. Ушбу мамлакат Буюк Ипак йўлида жойлашгани ҳамда бу ерда йилнинг 300 кунида қуёш чарақлаб туриши маълумот сифатида келтирилди. «Ўзбекистоннинг табиати жуда ранг-баранг. Бу ерда Қизилқум саҳроси, Тянь-Шань тоғлари, чексиз чўллар ва водийлар мавжуд», — дейди таржимон.
Италиялик аёл таржимондан «Самарқанд Ўзбекистонда жойлашганми?» деб сўради. Шунда унинг ҳамроҳи унга «Сен бу шаҳар ҳақида қаердан биласан?» деб савол берди. Шунда аёл Роберто Веччионининг «Samarcanda» қўшиғини хиргойи қилиб беради ҳамда «Мен бу шаҳарга боришни хоҳлайман» дейди.
Шундан сўнг италияликларга Ўзбекистон рамзларидан бири дўппи таништирилди.
Италияликлар ош, лағмон, манти, қурут, ҳолва ва новвотни татиб кўради. Барча ўзбек таомлари ва ширинликлар уларга манзур бўлган. «Ҳаммамиз зудлик билан Ўзбекистонга боришимиз керак», «Бу таомларнинг мазасини унутиб бўлмайди!», «Нега бу таомларни олдинроқ татиб кўрмадик?» дейди италияликлар.
Изоҳ (0)