Premyerasiga deyarli o‘n yil bo‘lgan “Epidemiya” (Contagion) filmi yana mashhurlikka erishmoqda. 2019-yilning dekabrida Warner katalogida tomosha qilishlar soni bo‘yicha 270-o‘rinda turgan ushbu film 2020-yilda 2-pog‘onaga ko‘tarilib oldi, deb xabar beradi “KinoPoisk”.
Ma’lumotlarga ko‘ra, Warner katalogining birinchi pog‘onasini “Garri Potter” filmining seriyalari egallagan. Bundan tashqari kartinaga bo‘lgan qiziqishni Amazon Prime obunachilari ham payqagan. iTunes’da esa 2011-yilda ekran yuzini ko‘rgan film “Parazitlar”, “Pichoqni olish” va “Muzyurak-2” filmlari bilan bir qatorda yetakchilik qilmoqda.
Ta’kidlanishicha, “Epidemiya” filmiga bo‘lgan qiziqishning ortishiga COVID-19 pandemiyasi sabab bo‘lgan. So‘nggi ma’lumotlarga ko‘ra, Xitoyning Xubey provinsiyasida tarqalgan koronavirus oqibatida butun dunyo bo‘ylab 167 mingdan ortiq odam kasallangan, vafot etganlar soni 5735 kishini tashkil etmoqda.
“Men hayratdan yoqamni ushlab qoldim. Xuddi hujjatli film ko‘rgandek bo‘ldim, undagi kinoyulduzlar haqiqiy insonlarni o‘ynayotgandek. Bu meni juda qo‘rquvga solib qo‘ydi”, — deydi filmni qayta tomosha qilgan rejissor Barri Jenkins.
Ssenariy muallifi Skott Z.Bernsning so‘zlariga ko‘ra, “Epidemiya” syujeti va COVID-19 pandemiyasi o‘rtasidagi o‘xshashlik ijtimoiy tarmoqlarda turli muhokamalarga sabab bo‘lgan. Ba’zi tomoshabinlar filmni global epidemiyani tasvirlashdagi aniqligi uchun maqtashayotgan bo‘lsa, boshqalar ssenariy muallifini maxfiy jamiyatlar va fitna nazariyalariga aloqadorlikda ayblamoqda.
“Epidemiya” filmida MEV-1 virusi ko‘rshapalak orqali cho‘chqaga, cho‘chqadan esa uning go‘shtidan taomlangan insonlarga yuqishi tasvirlangan.
Shuningdek, filmda global kasallik bilan kurashayotgan olimlar tasvirlangan. Ammo filmning yolg‘on ma’lumotlar bilan bog‘liq qismi ancha qiziqarli. Jurnalist Alan Krumvyede MEV-1 uchun davo borligi va o‘zi ham kasallikdan qutulishga muvaffaq bo‘lgani haqida yolg‘on ma’lumotlar tarqata boshlaydi.
Izoh (0)