Премьерасига деярли ўн йил бўлган «Эпидемия» (Contagion) фильми яна машҳурликка эришмоқда. 2019 йилнинг декабрида Warner каталогида томоша қилишлар сони бўйича 270-ўринда турган ушбу фильм 2020 йилда 2-поғонага кўтарилиб олди, деб хабар беради «КиноПоиск».
Маълумотларга кўра, Warner каталогининг биринчи поғонасини «Гарри Поттер» фильмининг сериялари эгаллаган. Бундан ташқари картинага бўлган қизиқишни Amazon Prime обуначилари ҳам пайқаган. iTunes’да эса 2011 йилда экран юзини кўрган фильм «Паразитлар», «Пичоқни олиш» ва «Музюрак-2» фильмлари билан бир қаторда етакчилик қилмоқда.
Таъкидланишича, «Эпидемия» фильмига бўлган қизиқишнинг ортишига COVID-19 пандемияси сабаб бўлган. Сўнгги маълумотларга кўра, Хитойнинг Хубэй провинциясида тарқалган коронавирус оқибатида бутун дунё бўйлаб 167 мингдан ортиқ одам касалланган, вафот этганлар сони 5735 кишини ташкил этмоқда.
«Мен ҳайратдан ёқамни ушлаб қолдим. Худди ҳужжатли фильм кўргандек бўлдим, ундаги киноюлдузлар ҳақиқий инсонларни ўйнаётгандек. Бу мени жуда қўрқувга солиб қўйди», — дейди фильмни қайта томоша қилган режиссёр Барри Женкинс.
Сценарий муаллифи Скотт З.Бернснинг сўзларига кўра, «Эпидемия» сюжети ва COVID-19 пандемияси ўртасидаги ўхшашлик ижтимоий тармоқларда турли муҳокамаларга сабаб бўлган. Баъзи томошабинлар фильмни глобал эпидемияни тасвирлашдаги аниқлиги учун мақташаётган бўлса, бошқалар сценарий муаллифини махфий жамиятлар ва фитна назарияларига алоқадорликда айбламоқда.
«Эпидемия» фильмида MEV-1 вируси кўршапалак орқали чўчқага, чўчқадан эса унинг гўштидан таомланган инсонларга юқиши тасвирланган.
Шунингдек, фильмда глобал касаллик билан курашаётган олимлар тасвирланган. Аммо фильмнинг ёлғон маълумотлар билан боғлиқ қисми анча қизиқарли. Журналист Алан Крумвьеде MEV-1 учун даво борлиги ва ўзи ҳам касалликдан қутулишга муваффақ бўлгани ҳақида ёлғон маълумотлар тарқата бошлайди.
Изоҳ (0)