Koronavirus sabab ta’tilga chiqqan va yo‘l haqining keskin oshishi sabab Toshkent shahrida qolayotgan talabalar 18-mart, chorshanba kuni, viloyatlariga qaytariladi. Bu haqda “Daryo” muxbirlari xabar bermoqda.
“Daryo”ning Samarqand viloyatidagi muxbiri Farhod Norbo‘tayevning viloyat hokimligiga tayanib xabar berishicha, samarqandlik talabalarni viloyatga qaytarish uchun avtobuslar yuborilgan. Talabalar uchun mo‘ljallangan avtobus 18-mart, chorshanba kuni, soat 09:00 va 10:00 da Samarqand shahriga qarab yo‘l oladi.
Andijonlik muxbir Umidjon Mamarasulovning yozishicha, viloyat hokimligi hamda transport boshqarmasi tashabbusi bilan 17-mart, seshanba kuni, soat 18:00 da Andijon shahridan Toshkent shahriga 20 dona yengil avtomobillar karvoni yo‘lga chiqqan.
“Avtomobillar karvoni 18-mart, chorshanba kuni, soat 09:00 da Toshkent shahrining “Qo‘yliq” avtoturargohidan Andijon viloyatiga yo‘lga chiqishni va istagan yurtdoshlarimizni bepul olib kelishini ma’lum qilamiz”, — deyiladi hokimlik bergan ma’lumotda.
“Daryo”ning Farg‘ona viloyatidagi muxbiri Azizjon Ermatovning qo‘shimcha qilishicha, 16—17-mart kunlari 300 nafar farg‘onalik talaba viloyatga olib kelingan.
Birgina Buvayda tumani hokimligi tashabbusi bilan 16-mart kuni dastlabki mashinalar karvoni Toshkentda tahsil olayotgan 24 nafar talabani uyiga olib qaytgan.
“Talabalarga ta’til berilgach, hamma uyga ketish harakatiga tushib qoldi. Chegirma borligi uchun poyezdda qaytmoqchi bo‘ldik. Lekin biletlar qolmagan ekan. Taksilar bilan gaplashsak, narx 110-150 ming so‘mga chiqib ketibdi. Uyga telefon qilsam, onam hokimiyat mashina jo‘natayotganini aytdi. Kecha uyimizgacha bepul olib kelib qo‘yishdi”, — deydi farg‘onalik talaba Nasiba Muhamedjanova.
Buvayda tumani hokimi Bekzodjon Ibragimovning aytishicha, 17-mart kuni ham Toshkentda tahsil olayotgan talabalarni olib kelish davom etgan.
Shuningdek, “Vatanparvar” tashkilotining Bag‘dod tumani o‘quv sport-texnika klubi ham talabalarni poytaxtdan uyiga qaytarish uchun 8 ta avtomobil yuborgan. 17-mart kuni mazkur xayriya karvoni Bag‘dod, Uchko‘prik, Rishton va oltiariqlik 28 nafar talaba bilan uyiga qaytgan.
“Qo‘yliqdagi ‘vodiy pitak’ka kelib, narxni surishtirsam haydovchilar 100-125 ming kami yo‘q, deyishdi. Ayrimlari 150 ming so‘mgacha narx aytishdi. Shu payt bir xil bezatilgan mashinalar ‘pitak’ka kirib keldi. Keyin ‘Studentlarni Bag‘dodga tekinga olib ketamiz’, degan chaqiriqlarni eshitdim. Ishonib-ishonmay borsam, rost ekan”, — deydi Sh.Mirsoatova.
Ma’lum bo‘lishicha, 17-mart kuni Namangan viloyatidan Toshkent shahriga qarab 35 ta yengil avtomobil yo‘lga chiqqan.
“Avtomobillar 18-mart kuni soat 10:00 da Toshkentdagi ‘Qo‘yliq’ avtoturargohidan Namanganga yo‘lga chiqadigan talabalarni bepul olib qaytadi”, — deya xabar beradi “Daryo”ning Namangan viloyatidagi muxbiri Azizbek Abduvaliyev.
Ta’kidlanishicha, mazkur aksiya ijtimoiy tarmoq foydalanuvchilarini ham e’tiborsiz qoldirmagan. Jumladan, Auto Family guruhi a’zolari ham 17-mart kuni 12 ta mashinada namanganlik talabalarni uyga olib qaytgan. Shuningdek, mahalliy “Voditeli Uzbekistana” guruhi haydovchilari ham xayrli yumush uchun Toshkentga otlangan.
Izoh (0)