Hukumatning “Toshkent shahar yo‘lovchi transporti tizimini takomillashtirish chora-tadbirlari to‘g‘risida”gi qarori qabul qilindi. Unda poytaxt aholisi va mehmonlarga transportda sifatli xizmatlar ko‘rsatish, yo‘lovchi transporti tizimini integratsiyalash maqsadida olib boriladigan choralar bayon etilgan.
Metrobus
Unga ko‘ra, Toshkentda metrobuslar yo‘lga qo‘yiladi. Tajriba sifatida Istiqlol va Farg‘ona yo‘li ko‘chasi bo‘ylab Amir Temur xiyobonidan Compass savdo-ko‘ngilochar markaziga qadar yo‘nalish belgilangan. 2020-yil 1-noyabrgacha ushbu yo‘nalish bo‘ylab maxsus qatnov yo‘lagini yaratish va 20 ta zamonaviy elektrobus xarid qilib, quvvatlash uskunalari bilan ta’minlash lozim. Agar tajriba loyihasi muvaffaqiyatli o‘tsa, metrobuslar shaharning boshqa yo‘llarida ham tashkil etiladi.
Texnologiyalar
Yo‘lkira haqini NFC (Near-Fiel Communication) texnologiyasi yordamida nafaqat Humo kartalari, balki Uzcard NFC orqali ham to‘lash imkoniyati yaratiladi. Uni 2020-yilning 1-may sanasigacha amalga oshirish rejalashtirilgan. Shuningdek, yo‘lkirani NFC yoki QR orqali telefon yordamida to‘lash imkoniyati ham joriy etiladi.
Transport to‘lovi tizimiga xalqaro to‘lov tizimlari bank kartalarini jalb etish ko‘zda tutilgan. 2020-yilning iyuniga qadar 15 ta avtomatlashtirilgan transport kartalarini sotish shoxobchalarini o‘rnatish, “aqlli soatlar”, breloklar va brasletlar orqali yo‘lkira haqini to‘lash imkoniyati yaratiladi.
Oktabr oyida aholiga jamoat transportida yurishni rejalashtirish va uning ishi to‘g‘risida boshqa foydali ma’lumotlarni olish imkonini beruvchi “Yandeks.Transport”ga o‘xshash “Mening yo‘nalishim” elektron tizimini joriy etish rejalashtirilgan.
Dekabr oyiga qadar avtobuslar salonida bekatlar haqida ma’lumot beruvchi avtomatlashtirilgan tizim joriy etiladi. Oraliq bekatlarda esa avtobuslarning harakatlanish jadvali va bekatga yetib kelish vaqtini ko‘rsatuvchi elektron tablolar o‘rnatiladi.
Yangi poyezdlar
2020—2023-yillarning har birida 10 tadan, 2024-yilda esa 8 ta yangi metro tarkiblari sotib olinadi.
Avtobus va yo‘nalishli taksilardagi o‘zgarishlar
Metropolitenning Yerusti halqa yo‘li (Qo‘yliq), Yunusobod va Sergeli yo‘nalishilari qurib bitkazilayotgani sababli ular harakatini takrorlovchi avtobus va yo‘nalishli taksilar yo‘nalishlari tarmog‘i qayta ko‘rib chiqiladi. Ularning ayrimlari optimallashtirilsa, ayrimlari olib tashlanadi. Ularning to‘liq ro‘yxati bilan qarorda batafsil tanishish mumkin.
Izoh (0)