Коронавирус сабаб таътилга чиққан ва йўл ҳақининг кескин ошиши сабаб Тошкент шаҳрида қолаётган талабалар 18 март, чоршанба куни, вилоятларига қайтарилади. Бу ҳақда «Дарё» мухбирлари хабар бермоқда.
«Дарё»нинг Самарқанд вилоятидаги мухбири Фарҳод Норбўтаевнинг вилоят ҳокимлигига таяниб хабар беришича, самарқандлик талабаларни вилоятга қайтариш учун автобуслар юборилган. Талабалар учун мўлжалланган автобус 18 март, чоршанба куни, соат 09:00 ва 10:00 да Самарқанд шаҳрига қараб йўл олади.
Андижонлик мухбир Умиджон Мамарасуловнинг ёзишича, вилоят ҳокимлиги ҳамда транспорт бошқармаси ташаббуси билан 17 март, сешанба куни, соат 18:00 да Андижон шаҳридан Тошкент шаҳрига 20 дона енгил автомобиллар карвони йўлга чиққан.
«Автомобильлар карвони 18 март, чоршанба куни, соат 09:00 да Тошкент шаҳрининг «Қўйлиқ» автотураргоҳидан Андижон вилоятига йўлга чиқишни ва истаган юртдошларимизни бепул олиб келишини маълум қиламиз», — дейилади ҳокимлик берган маълумотда.
«Дарё»нинг Фарғона вилоятидаги мухбири Азизжон Эрматовнинг қўшимча қилишича, 16—17 март кунлари 300 нафар фарғоналик талаба вилоятга олиб келинган.
Биргина Бувайда тумани ҳокимлиги ташаббуси билан 16 март куни дастлабки машиналар карвони Тошкентда таҳсил олаётган 24 нафар талабани уйига олиб қайтган.
«Талабаларга таътил берилгач, ҳамма уйга кетиш ҳаракатига тушиб қолди. Чегирма борлиги учун поездда қайтмоқчи бўлдик. Лекин билетлар қолмаган экан. Таксилар билан гаплашсак, нарх 110-150 минг сўмга чиқиб кетибди. Уйга телефон қилсам, онам ҳокимият машина жўнатаётганини айтди. Кеча уйимизгача бепул олиб келиб қўйишди», — дейди фарғоналик талаба Насиба Муҳамеджанова.
Бувайда тумани ҳокими Бекзоджон Ибрагимовнинг айтишича, 17 март куни ҳам Тошкентда таҳсил олаётган талабаларни олиб келиш давом этган.
Шунингдек, «Ватанпарвар» ташкилотининг Бағдод тумани ўқув спорт-техника клуби ҳам талабаларни пойтахтдан уйига қайтариш учун 8 та автомобиль юборган. 17 март куни мазкур хайрия карвони Бағдод, Учкўприк, Риштон ва олтиариқлик 28 нафар талаба билан уйига қайтган.
«Қўйлиқдаги ‘водий питак’ка келиб, нархни суриштирсам ҳайдовчилар 100-125 минг ками йўқ, дейишди. Айримлари 150 минг сўмгача нарх айтишди. Шу пайт бир хил безатилган машиналар ‘питакъка кириб келди. Кейин ‘Студентларни Бағдодга текинга олиб кетамиз’, деган чақириқларни эшитдим. Ишониб-ишонмай борсам, рост экан», — дейди Ш.Мирсоатова.
Маълум бўлишича, 17 март куни Наманган вилоятидан Тошкент шаҳрига қараб 35 та енгил автомобиль йўлга чиққан.
«Автомобиллар 18 март куни соат 10:00 да Тошкентдаги ‘Қўйлиқ’ автотураргоҳидан Наманганга йўлга чиқадиган талабаларни бепул олиб қайтади», — дея хабар беради «Дарё»нинг Наманган вилоятидаги мухбири Азизбек Абдувалиев.
Таъкидланишича, мазкур акция ижтимоий тармоқ фойдаланувчиларини ҳам эътиборсиз қолдирмаган. Жумладан, Auto Family гуруҳи аъзолари ҳам 17 март куни 12 та машинада наманганлик талабаларни уйга олиб қайтган. Шунингдек, маҳаллий «Водители Узбекистана» гуруҳи ҳайдовчилари ҳам хайрли юмуш учун Тошкентга отланган.
Изоҳ (0)