Shahrisabz tumani xalq ta’limi bo‘limi mansabdorlari ustidan jinoyat ishi qo‘zg‘atilgan. Shu sababdan ham ushbu ishni o‘rganayotgan prokuratura xodimlari maktab direktorlaridan lavozimiga o‘tishda kimgadir pul bergan yoki bermaganini so‘ragan. Bu haqda “Daryo”ga Qashqadaryo prokuraturasi ma’lum qilmoqda.
Shahrisabz prokuraturasi maktab direktorlarini chaqirib, direktorlikka o‘tish uchun pora bergan-bermagani bilan qiziqatyogani xususidagi maqolada maktab direktorlari prokuratura xodimlari ularni maqsadsiz 4-5 soatlab ushlab turishidan shikoyat qilgandi.
“Kechasi soat 20:30 ga qadar sovuqda prokuraturada qolib ketdik, kechki payt turmush o‘rtog‘im kelib olib ketdi. Uyga borgach, rosa gap eshitdim”, — degandi tumandagi 23-maktab direktori Barno Jo‘rayeva.
Viloyat prokuraturasi esa ‘Barno Jo‘rayeva tuman prokuraturasi tergovchisi U.Eshqobilov tomonidan soat 18:05 dan 18:40 gacha bo‘lgan paytda so‘roq qilingan’ deyapti.
“Nega chaqirishganini bilmadim, faqat borgan paytim ‘qachon maktab direktori bo‘lgansiz, direktorlikka o‘tish uchun qancha pul bergansiz?’ deb so‘rashdi. Pul bermaganimni aytdim. Meni birinchi marotaba chaqirishlari emas. O‘tgan safar ham chaqirishgandi va kechasi qo‘yib yuborishdi. Kechgacha ushlab turishgani uchun eshikdan chiqayotgan paytim qayd daftariga nechchida chiqib ketayotganimni, kechgacha ushlab turishganini yozdim”, — deya voqeaga qo‘shimcha qilgandi Go‘zal Aralova.
“Barno Jo‘rayeva rahbarligidagi maktabda kuz-qish mavsumiga tayyorgarlik paytida 7 million 200 ming so‘mlik ta’mirlash ishlarida 1 million 476 ming so‘mlik ishlar hisobotga qo‘shib yozilgani aniqlangan. 35-sonli maktab direktori Go‘zal Aralova esa tergov guruhi a’zosi Shahrisabz tumani IIB TB tergovchisi U.Mustafoyev tomonidan 2020-yil 21-fevral kuni soat 17:00 dan 17:20 gacha so‘roq qilingan. Ish bo‘yicha faqat direktor bo‘lishida yoki o‘rinbosarlarini tayinlashda biror-bir shaxs manfaatdor bo‘lgan yoxud bo‘lmaganligi so‘ralgan”, — deyiladi Qashqadaryo prokuraturasi munosabatida.
Hozirda XTB mansabdorlariga nisbatan ochilgan jinoyat ishi yuzasidan tergov harakatlari olib borilmoqda. Holat yuzasidan mas’ullarga Departamentning Shahrisabz tumani bo‘limi tomonidan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) 3-qismi “a” bandi va 209-moddasi (Mansab soxtakorligi) 1-qismi bilan jinoyat ishi qo‘zg‘atilgan.
Aniqlanishicha, ayni kunda Shahrisabz tumani prokurori lavozimidan olingan. Biroq viloyat prokuraturasi mazkur voqeaga to‘xtalmagani bois, prokurorning lavozimidan ketishi mazkur jarayon bilan bog‘liq yoki bog‘liqmasligi hozircha noma’lum.
Shuningdek, prokuratura tuman XTB mansabdorlariga nisbatan jinoyat ishi ochilganligini yozsa-da, maktab direktorlari lavozimga o‘tish uchun pul began yoki bermagani bilan qiziqqanini bildirgan. Holbuki, maktab direktorlarini mansabga qo‘yish va undan olish viloyat xalq ta‘limi boshqarmasi mas’ullari zimmasidagi vakolat hisoblanadi.
Izoh (0)