Шаҳрисабз тумани халқ таълими бўлими мансабдорлари устидан жиноят иши қўзғатилган. Шу сабабдан ҳам ушбу ишни ўрганаётган прокуратура ходимлари мактаб директорларидан лавозимига ўтишда кимгадир пул берган ёки бермаганини сўраган. Бу ҳақда «Дарё»га Қашқадарё прокуратураси маълум қилмоқда.
Шаҳрисабз прокуратураси мактаб директорларини чақириб, директорликка ўтиш учун пора берган-бермагани билан қизиқатёгани хусусидаги мақолада мактаб директорлари прокуратура ходимлари уларни мақсадсиз 4-5 соатлаб ушлаб туришидан шикоят қилганди.
«Кечаси соат 20:30 га қадар совуқда прокуратурада қолиб кетдик, кечки пайт турмуш ўртоғим келиб олиб кетди. Уйга боргач, роса гап эшитдим», — деганди тумандаги 23-мактаб директори Барно Жўраева.
Вилоят прокуратураси эса ‘Барно Жўраева туман прокуратураси терговчиси У.Эшқобилов томонидан соат 18:05 дан 18:40 гача бўлган пайтда сўроқ қилинган’ деяпти.
«Нега чақиришганини билмадим, фақат борган пайтим ‘қачон мактаб директори бўлгансиз, директорликка ўтиш учун қанча пул бергансиз?’ деб сўрашди. Пул бермаганимни айтдим. Мени биринчи маротаба чақиришлари эмас. Ўтган сафар ҳам чақиришганди ва кечаси қўйиб юборишди. Кечгача ушлаб туришгани учун эшикдан чиқаётган пайтим қайд дафтарига неччида чиқиб кетаётганимни, кечгача ушлаб туришганини ёздим», — дея воқеага қўшимча қилганди Гўзал Аралова.
«Барно Жўраева раҳбарлигидаги мактабда куз-қиш мавсумига тайёргарлик пайтида 7 миллион 200 минг сўмлик таъмирлаш ишларида 1 миллион 476 минг сўмлик ишлар ҳисоботга қўшиб ёзилгани аниқланган. 35-сонли мактаб директори Гўзал Аралова эса тергов гуруҳи аъзоси Шаҳрисабз тумани ИИБ ТБ терговчиси У.Мустафоев томонидан 2020 йил 21 февраль куни соат 17:00 дан 17:20 гача сўроқ қилинган. Иш бўйича фақат директор бўлишида ёки ўринбосарларини тайинлашда бирор-бир шахс манфаатдор бўлган ёхуд бўлмаганлиги сўралган», — дейилади Қашқадарё прокуратураси муносабатида.
Ҳозирда ХТБ мансабдорларига нисбатан очилган жиноят иши юзасидан тергов ҳаракатлари олиб борилмоқда. Ҳолат юзасидан масъулларга Департаментнинг Шаҳрисабз тумани бўлими томонидан Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а» банди ва 209-моддаси (Мансаб сохтакорлиги) 1-қисми билан жиноят иши қўзғатилган.
Аниқланишича, айни кунда Шаҳрисабз тумани прокурори лавозимидан олинган. Бироқ вилоят прокуратураси мазкур воқеага тўхталмагани боис, прокурорнинг лавозимидан кетиши мазкур жараён билан боғлиқ ёки боғлиқмаслиги ҳозирча номаълум.
Шунингдек, прокуратура туман ХТБ мансабдорларига нисбатан жиноят иши очилганлигини ёзса-да, мактаб директорлари лавозимга ўтиш учун пул беган ёки бермагани билан қизиққанини билдирган. Ҳолбуки, мактаб директорларини мансабга қўйиш ва ундан олиш вилоят халқ таълими бошқармаси масъуллари зиммасидаги ваколат ҳисобланади.
Изоҳ (0)