Shavkat Mirziyoyev: 2020-yilda kambag‘allikni qisqartirish bo‘yicha 700 mln dollarlik dasturlar amalga oshiriladi

Kambag‘allikni qisqartirish uchun birinchi navbatda ishsizlikni kamaytirish kerak. Bu haqda O‘zbekiston Prezidenti Shavkat Mirziyoyev Xalqaro xotin-qizlar kuni munosabati bilan o‘tkazilgan bayram tadbiridagi nutqida aytib o‘tdi.

“O‘zbekistonda kambag‘allikni qisqartirish ustuvor vazifa etib belgilandi va bu yo‘nalishda keng ko‘lamli chora-tadbirlarni amalga oshirishni boshladik. Bir haqiqatni aniq tushunib olishimiz kerak — kambag‘allikni qisqartirish uchun birinchi navbatda ishsizlikni kamaytirish kerak. Avvalo, aholini zamonaviy kasb-hunarlarga o‘qitish, ularning iqtisodiy va moliyaviy savodxonligini oshirish, odamlarda, ayniqsa, ayollarimizda tadbirkorlikka ishtiyoqni uyg‘otish zarur”, — dedi Prezident.

Preziyentning ma’lum qilishicha, shu kunlarda O‘zbekiston Kasaba uyushmalari federatsiyasi boshchiligida tuzilgan respublika ishchi guruhi viloyatlarda bo‘lib, turmush sharoiti og‘ir bo‘lgan xotin-qizlarning ahvolini har bir hudud bo‘yicha aniq tahlil qilib, ularga amaliy ko‘mak bermoqda. Ishchi guruh tomonidan qishloq joylarda yashayotgan ayollarning, mustaqil hayotga kirayotgan qizlarning huquq va manfaatlarini ta’minlash, ijtimoiy himoya qilish, ularga har tomonlama yordam berish bo‘yicha har bir mahalla kesimida dasturlar ishlab chiqilmoqda.

Ishchi guruhning kun-u tun uzluksiz ishlaydigan, xotin-qizlarning murojaatlarini qabul qiladigan “Ishonch telefonlari” faoliyati yo‘lga qo‘yilgan. “Endi mamlakatimizning istalgan shahar yoki qishlog‘idan, chekka ovullardan ham ayollarimiz 1211 qisqa raqamini terib, ushbu markazga bevosita murojaat qilish imkoniga ega bo‘ldilar. Biz buni xalq bilan samarali muloqot olib borish yo‘lidagi boshlagan ishlarimizning mantiqiy davomi, deb baholaymiz”, — dedi Prezident Shavkat Mirziyoyev.