O‘zbekiston Prezidenti Shavkat Mirziyoyev 9-mart, dushanba kuni, Rossiya va Ozarbayjon bilan ikki tomonlama investitsiyaviy va savdo-iqtisodiy hamkorlikning joriy holati va rivojlanish istiqbollari muhokamasiga bag‘ishlangan yig‘ilish o‘tkazdi. Bu haqda Prezident matbuot xizmati xabar berdi.
Qayd etilishicha, keyingi yillarda ushbu mamlakatlar bilan o‘zaro savdo va investitsiya ko‘rsatkichlari muttasil ortib bormoqda. Xususan, 2019-yil yakunlariga ko‘ra, Rossiya bilan tovar ayirboshlash hajmi o‘tgan yilgiga nisbatan 17 foizga ortib, 6,6 milliard dollarni tashkil etdi.
Investitsiyaviy hamkorlik mustahkamlanmoqda. O‘tgan yili O‘zbekistonda Rossiya sarmoyasi ishtirokida 484 ta yangi korxona tashkil etildi, ularning soni umumiy hisobda 1828 taga yetdi.
Yig‘ilishda ushbu mamlakatlar bilan qo‘shma loyihalarni o‘z vaqtida va sifatli amalga oshirish hamda investitsiya, savdo va transport-logistika sohalaridagi ikki tomonlama hamkorlikni mustahkamlash bo‘yicha yangi takliflar ishlab chiqishga alohida e’tibor qaratildi.
Rossiya bilan bo‘lajak ikki tomonlama tadbirlar muhokama qilindi. Xususan, rossiyalik sheriklar bilan 3,5 mingta ish o‘rni yaratish imkonini beradigan qiymati 7,3 milliard dollarlik loyihalarni amalga oshirish rejalashtirilgan.
Ushbu tadbirlarni mazmunan boyitish zarurligi alohida qayd etildi, ishni samarali tashkil qilish bo‘yicha ustuvor vazifalar belgilandi.
2020-yilning mart oyi uchinchi o‘n kunligida O‘zbekiston va Rossiya o‘rtasida hamkorlik bo‘yicha hukumatlararo qo‘shma komissiya yig‘ilishini o‘tkazish rejalashtirilgan.
Prezident Shavkat Mirziyoyev Rossiya va Ozarbayjonning yetakchi kompaniya va tashkilotlari bilan savdo va investitsiyaviy hamkorlikni faollashtirish, sheriklikning yangi yo‘nalishlarini ishlab chiqish bo‘yicha topshiriqlar berdi.
Qishloq va o‘rmon xo‘jaligi, sanoat, shu jumladan, agrosanoat, transport va logistika, ta’lim va innovatsiyalar Rossiya bilan hamkorlikning yangi ustuvor yo‘nalishlari sifatida belgilandi.
Izoh (0)