Samarqand viloyatining Ishtixon tumanida yashagan ayol firibgarligi uchun javobgarlikka tortildi, deb xabar beradi Zarnews.
Samarqand viloyati Ishtixon tumanida istiqomat qiluvchi Baxtiyor AQShga ketish, u yerda ishlash maqsadida Green Card o‘ynaydi. Lotereyasiga “yutuq” chiqavermagach, folbindan umid qiladi. Xurshida folbinga esa xuddi shunday “o‘lja” kerak edi, deyiladi xabarda.
Qayd etilishicha, 2019-yil aprel oyida Baxtiyorning fol bilan uch kunda “yo‘lini ochib”, Amerikaga ketishiga yordam berishini va’da qiladi. Uning ishonchiga kirib aldab, Oqdaryo tumani Loyish shaharchasi Zarafshon ko‘chasidagi uyida 9 500 000 so‘m miqdoridagi pullarini firibgarlik yo‘li bilan qo‘lga kiritadi. Baxtiyor uch kundan keyin AQShga ketishga hozirlik ko‘radi.
“Uch kundan so‘ng chindan ham uning telefoni jiringlaydi. Qo‘ng‘iroq qilgan odam ‘Biz AQSh elchixonasidanmiz, keling, hujjatlaringizni oling’ deydi. Buni eshitgan Baxtiyor shoshilinch poytaxtga yo‘l oladi. Borganida elchixonadan hech kim qo‘ng‘iroq qilmagani aniq bo‘ladi. Aldangan Baxtiyor ortga qaytadi va tegishli organlarga murojaat qiladi.
Ichki ishlar organlari ko‘magida unga qo‘ng‘iroq qilingan yashirin raqam Xurshida folbinniki ekanligi aniqlanadi. Sud hukmiga ko‘ra bir necha bor sudlangan folbinga 1 yil 9 oy 28 kun ozodlikni cheklash hamda 10 714 300 so‘m jarima jazosi belgilandi”, — deyiladi xabarda.
Izoh (0)