Самарқандда фуқарони Америкага жўнатишини айтиб, қарийб 10 млн сўмга чув туширган фолбин жазоланди

Самарқанд вилоятининг Иштихон туманида яшаган аёл фирибгарлиги учун жавобгарликка тортилди, деб хабар беради Zarnews.

Самарқанд вилояти Иштихон туманида истиқомат қилувчи Бахтиёр АҚШга кетиш, у ерда ишлаш мақсадида Green Card ўйнайди. Лотереясига «ютуқ» чиқавермагач, фолбиндан умид қилади. Хуршида фолбинга эса худди шундай «ўлжа» керак эди, дейилади хабарда.

Қайд этилишича, 2019 йил апрель ойида Бахтиёрнинг фол билан уч кунда «йўлини очиб»,  Америкага кетишига ёрдам беришини ваъда қилади. Унинг ишончига кириб алдаб, Оқдарё тумани Лойиш шаҳарчаси Зарафшон кўчасидаги уйида 9 500 000 сўм миқдоридаги пулларини фирибгарлик йўли билан қўлга киритади. Бахтиёр уч кундан кейин АҚШга кетишга ҳозирлик кўради.

«Уч кундан сўнг чиндан ҳам унинг телефони жиринглайди. Қўнғироқ қилган одам ‘Биз АҚШ элчихонасиданмиз, келинг, ҳужжатларингизни олинг’ дейди. Буни эшитган Бахтиёр шошилинч пойтахтга йўл олади. Борганида элчихонадан ҳеч ким қўнғироқ қилмагани аниқ бўлади. Алданган Бахтиёр ортга қайтади ва тегишли органларга мурожаат қилади.

Ички ишлар органлари кўмагида унга қўнғироқ қилинган яширин рақам Хуршида фолбинники эканлиги аниқланади. Суд ҳукмига кўра бир неча бор судланган фолбинга 1 йил 9 ой 28 кун озодликни чеклаш ҳамда 10 714 300 сўм жарима жазоси белгиланди», — дейилади хабарда.