Farg‘onada 20 yoshli qiz ko‘chadan chaqaloq topib olganini aytib IIBga murojaat qildi. Aslida chaqaloqni uning o‘zi dunyoga keltirgani aniqlandi

Farg‘onada 20 yoshli qiz nikohsiz tug‘ilgan farzandidan voz kechishga urindi. Farg‘ona viloyati Oltiariq tumani prokuraturasining “Daryo”ga xabar berishicha, voqea 3-mart, seshanba kuni, yuz bergan.

Farg‘onada ota-onasi bilan yashovchi 20 yoshli Yasmina (ismi o‘zgartirilgan) Eshmat (ismi o‘zgartirilgan) bilan sevishib qoladi. Yigit qizning uyiga sovchi yuboradi. Biroq qizning ota-onasi to‘yga rozilik bermaydi.

Ota-onaning qarshiligiga qaramasdan, yoshlar o‘rtasidagi munosabatlar davom etib, chuqurlashib boradi. Oqibatda esa Yasmina homilador bo‘lib qoladi. Shu yilning 3-martida esa qiz o‘z xonadonida farzandli bo‘ladi.

Yasmina ota-onasidan qo‘rqib, ertalab chaqalog‘ini o‘z ishxonasi oldiga olib kelib, tuman IIB navbatchilik qismiga qo‘ng‘iroq qilgan.

Shundan so‘ng, Yasmina chaqalog‘i bilan tuman markaziy shifoxonasiga yuborilgan. Tibbiy ko‘rik chaqaloqni Yasminaning o‘zi tuqqanligini aniqlangan. Qiz bolani uyda tuqqanligi haqida tushuntirish xati yozib bergan.

Mazkur holat yuzasidan tuman prokuraturasi tomonidan tergovga qadar tekshirish olib borilmoqda.