Давлат улуши бўлган банкларни хусусийлаштириш жараёни ҳақида маълумот берилди

Молия вазири ўринбосари Шоҳруҳ Шораҳмедов бу борада Халқаро молия корпорацияси ва бошқа хорижий инвесторлар билан музокаралар олиб борилаётганини таъкидлаган. Бу ҳақда «Kun.uz» хабар берди.

«Давлат улуши бўлган банкларнинг ҳаммаси бирданига хусусийлаштирилади, деб айтолмаймиз. Бу жуда мураккаб, вақт талаб қиладиган масала. Ҳозирча «Саноат қурилиш» банкка ўхшаган йирик-йирик банклар ҳақида гапиришимиз мумкин. «Саноат қурилиш» банк (ўтган йили) Лондон фонд биржасида облигацияларини чиқарди.

Айни пайтда «Ипотека» банк фаолиятини ислоҳ қилиш ҳаракатидамиз. Бошқа банклар бўйича ҳам ишлар олиб бориляпти. Йил охирига бориб, инвесторларни жалб қилишни бошлаймиз.

Вақт ўтиши билан бу жараёнлар тезлашади, деб ўйлаймиз. Яқин йилларда давлат улуши бўлган банклар тўлиқ хусусийлаштирилиши устида иш олиб борилмоқда», – деди Шораҳмедов 4 март куни Халқаро пресс-клубда.

2019 йили Молия вазирлигига давлат улуши юқори бўлган банкларни ислоҳ қилиш, уларга хорижий инвесторларни жалб қилиш ва халқаро бозорга чиқариш бўйича вазифалар юклатилган эди.

«Шунинг учун вазирлигимизда махсус бошқарма (Давлат иштирокидаги тижорат банкларини ислоҳ қилишни мувофиқлаштириш бошқармаси) ташкил этилган ҳамда ушбу масала вазир ўринбосарининг функцияларига киритилган», – деган вазир ўринбосари.

Ўзбекистонда стратегик аҳамиятга эга корхоналардан ташқари, давлат улуши мавжуд барча корхоналар босқичма-босқич хусусийлаштирилиши эълон қилинган.

2020 йилдан бошлаб мамлакат банкларида кенг кўламли трансформация дастури амалга оширилади. 2020 йилда «Миллий» банк ва «Ипотека» банк ҳам ўз евробондларини чиқаради.

Устав капиталидаги давлат акция пакетлари (улушлари) тўлиқ хусусий секторга сотилиши таклиф этилаётган банклар қуйидагилар:

• «Пойтахт» банк АЖ (ҳозирда давлат улуши – 100 фоиз)
• Asia Alliance банк АТБ (100)
• «Турон» банк АТБ (97,6)
• «Қишлоқ қурилиш» банк АТБ (96,5)
• «Асака» АТБ (95,9)
• АТ «Алоқа» банк (94,2)
• «Саноат қурилиш» банк» АТБ (89,1)
• «Ипотека» банк АТИБ (84,7)
• «Ўзагроэкспорт» банк АТБ (75)
• «Ипак йўли» акциядорлик инновация тижорат банки АЖ (0,4)
• Trast банк ХАБ (0,1)
• Чет эл капитали иштирокидаги «Ҳамкор» банк АТБ (0,01)

• «Халқ» банки АТБ (100)
• «Ўзбекистон Республикаси Ташқи иқтисодий фаолият миллий» банки АЖ (100)
• «Агро» банк АТБ (94,3)
• «Микрокредит» банк АТБ (84,8)