Apple asoschisi Stiv Jobsning bevasi, xayriya ishlari bilan shug‘ullanuvchi Loren Pauell Jobs erining o‘limidan keyin o‘ziga qolgan ko‘p milliardlik merosni farzandlariga qoldirmaydi. Loren bu haqda The New York Times’ga bergan intervyusida ma’lum qilgan.
Loren Pauell Jobsning so‘zlariga ko‘ra, u ulkan boylikni bir vaqtlar Rokfellerlar oilasida bo‘lgani kabi bir oilaning ixtiyorida bo‘lishi noto‘g‘ri. Stiv Jobs ham o‘z oldiga hammadan boy bo‘lish maqsadini qo‘ymagan. Loren Pauell eridan qolgan merosni kam ta’minlangan insonlarga ko‘proq foydasi tegishi uchun xayriya ishlariga sarflamoqchi.
“Uzoq umr ko‘radigan bo‘lsam, boyligim hayotim bilan birga tugaydi”, — dedi u.
Loren Pauell Jobs farzandlari ham Stivdan qolgan meros masalasida onasining xohishini qo‘llab-quvvatlashi va xayriyaga qarshi emasligini bildirgan.
Loren Pauell Jobs 2004-yilda ta’lim va madaniy loyihalarni qo‘llab-quvvatlaydigan Emerson Collective xayriya tashkilotiga asos solgan. Stiv Jobsning o‘limidan keyin u bu maqsadlarga yanada ko‘proq pul sarfladi. Apple asoschisining bevasi Microsoft asoschisi Bill Geyts va uning rafiqasi Melinda, investor Uorren Baffett, Facebook asosochisi Marks Sukerberg hamda Rossiyaning eng boy odamlaridan biri hisoblanuvchi, “Nornikelya” egalaridan biri Vladimir Potanin ishtirokchisi bo‘lgan The Giving Pledge fondiga qo‘shilmagan.
Bloomberg milliarderlar reytingiga ko‘ra, Loren Pauell Jobsning boyligi 24 milliard dollar atrofida. U dunyoning eng badavlat insonlari reytingida 38-o‘rinda turadi. Jobs bilan nikohidan uch nafar farzandi — o‘g‘li Rid, qizlari Erin va Yeva bor.
Izoh (0)