Davlat ekologiya qo‘mitasi aholi, jamoatchilik tashkilotlari tomonidan atrof-muhitga zararli tashlamalar tashlayotgan yirik sement ishlab chiqarish korxonalari faoliyati yuzasidan shikoyat va murojaatlar asosida Andijon viloyatidagi “Sing Lida” MChJ qo‘shma korxonalarining faoliyati tekshirilgani haqida ma’lumot berdi.
Xabarga ko‘ra, qo‘mita 2020-yil 12–21-fevral kunlari Andijon viloyati, Asaka tumanida joylashgan “Sing Lida” MChJ QK faoliyatida, tabiatni muhofaza qilish va tabiiy resurslardan oqilona foydalanishga oid qonun va me’yoriy-huquqiy hujjatlar talablari ijrosining ta’minlanishi yuzasidan tekshirish o‘tkazgan.
Tekshirish davrida korxonaning klinker tayyorlash pechining ishlash jarayonida siklonlarning bir nechta joyida tuynuklar mavjudligi, o‘z navbatida ifloslantiruvchi moddalarning mazkur tuynuklardan to‘g‘ridan to‘g‘ri atmosfera havosiga tashlanayotganligi, klinker tayyorlash pechidagi ifloslantiruvchi moddalarni tashlash, 1 va 2-manbalardagi chang tozalash uskunasining samaradorligini o‘lchash uchun laboratoriya tahlillari o‘tkazilganida, 1-manbadagi sement changini ushlash qurilmasining samaradorligi 53,1 foiz (loyiha bo‘yicha 99,9 foiz), 2-manbadagi chang ushlash qurilmasining samaradorligi 60,7 foiz (loyiha bo‘yicha 99,9 foiz) ni tashkil etib, changlarni ushlab qolish samaradorligi past darajada ekanligi aniqlandi. O‘zbekiston Respublikasining “Tabiatni muhofaza qilish to‘g‘risida”, “Atmosfera havosini muhofaza qilish to‘g‘risida”gi qonunlar talablari buzilgani uchun aniqlangan kamchiliklarni tezkorlik bilan bartaraf etish, atmosfera havosiga tashlanadigan ifloslantiruvchi moddalarni kamaytirish maqsadida jamiyat balansida mavjud bo‘lgan, bugungi kunda ekologik talablarga javob bermaydigan holatda ishlab turgan klinker tayyorlash pechi va sement tayyorlash tegirmoni uskunalarining faoliyati vaqtincha to‘xtatilib, bajarilishi majburiy bo‘lgan ko‘rsatmalar berilgan.
Izoh (0)