Давлат экология қўмитаси аҳоли, жамоатчилик ташкилотлари томонидан атроф-муҳитга зарарли ташламалар ташлаётган йирик цемент ишлаб чиқариш корхоналари фаолияти юзасидан шикоят ва мурожаатлар асосида Андижон вилоятидаги «Sing Lida» МЧЖ қўшма корхоналарининг фаолияти текширилгани ҳақида маълумот берди.
Хабарга кўра, қўмита 2020 йил 12–21 февраль кунлари Андижон вилояти, Асака туманида жойлашган «Sing Lida» МЧЖ ҚК фаолиятида, табиатни муҳофаза қилиш ва табиий ресурслардан оқилона фойдаланишга оид қонун ва меъёрий-ҳуқуқий ҳужжатлар талаблари ижросининг таъминланиши юзасидан текшириш ўтказган.
Текшириш даврида корхонанинг клинкер тайёрлаш печининг ишлаш жараёнида циклонларнинг бир нечта жойида туйнуклар мавжудлиги, ўз навбатида ифлослантирувчи моддаларнинг мазкур туйнуклардан тўғридан-тўғри атмосфера ҳавосига ташланаётганлиги, клинкер тайёрлаш печидаги ифлослантирувчи моддаларни ташлаш, 1 ва 2-манбалардаги чанг тозалаш ускунасининг самарадорлигини ўлчаш учун лаборатория таҳлиллари ўтказилганида, 1-манбадаги цемент чангини ушлаш қурилмасининг самарадорлиги 53,1 фоиз (лойиҳа бўйича 99,9 фоиз), 2-манбадаги чанг ушлаш қурилмасининг самарадорлиги 60,7 фоиз (лойиҳа бўйича 99,9 фоиз) ни ташкил этиб, чангларни ушлаб қолиш самарадорлиги паст даражада эканлиги аниқланди. Ўзбекистон Республикасининг «Табиатни муҳофаза қилиш тўғрисида», «Атмосфера ҳавосини муҳофаза қилиш тўғрисида»ги қонунлар талаблари бузилгани учун аниқланган камчиликларни тезкорлик билан бартараф этиш, атмосфера ҳавосига ташланадиган ифлослантирувчи моддаларни камайтириш мақсадида жамият балансида мавжуд бўлган, бугунги кунда экологик талабларга жавоб бермайдиган ҳолатда ишлаб турган клинкер тайёрлаш печи ва цемент тайёрлаш тегирмони ускуналарининг фаолияти вақтинча тўхтатилиб, бажарилиши мажбурий бўлган кўрсатмалар берилган.
Изоҳ (0)