Prezident Shavkat Mirziyoyev 25-fevral, seshanba kuni, ikkinchi O‘zbekiston—Qozog‘iston hududlararo hamkorlik forumi doirasida O‘zbekistonga kelgan Qozog‘iston bosh vaziri Asqar Maminni qabul qildi, deya xabar bermoqda davlat rahbarining matbuot xizmati.
Uchrashuvda Shavkat Mirziyoyev keyingi yillarda ikki mamlakat o‘rtasidagi ko‘p qirrali munosabatlarning rivojlanish sur’ati tobora ortib borayotganini qayd etgan. Muntazamlik kasb etgan oliy darajadagi muloqotlar do‘stlik, yaxshi qo‘shnichilik va strategik sheriklikni mustahkamlashga, ikki tomonlama hamkorlikni aniq mazmun bilan boyitishga xizmat qilayotgani ta’kidlangan.
Asqar Mamin O‘zbekiston Prezidentiga samimiy qabul uchun minnatdorlik bildirib, Qozog‘istonning birinchi prezidenti — Elboshi Nursulton Nazarboyev va prezident Qosim-Jo‘mart To‘qayevning salomi va eng ezgu tilaklarini yetkazgan.
Prezident matbuot xizmatining qayd etishicha, uchrashuvda savdo-iqtisodiyot, investitsiya, transport-kommunikatsiya, energetika, agrar tarmoqlarda, ta’lim, madaniyat sohalari va boshqa ustuvor yo‘nalishlarda amaliy hamkorlikni yanada kengaytirish istiqbollari ko‘rib chiqilgan.
Tovar ayirboshlashdagi yuqori o‘sish sur’atlarini saqlab qolish uchun qulay sharoitlar yaratish, shuningdek, ikki mamlakat yetakchi kompaniyalari ishtirokida kooperatsiya va infratuzilmani rivojlantirish loyihalarini ilgari surish masalalariga alohida e’tibor qaratilgan.
Qo‘shma dasturlar asosida gumanitar va turizm sohalarida faol almashinuvlarni davom ettirish muhimligi qayd etilgan. Uchrashuv so‘ngida keng ko‘lamli O‘zbekiston—Qozog‘iston sherikligi doirasida yangi iqtisodiy kun tartibini shakllantirish bo‘yicha “yo‘l xaritasi”ni tayyorlashga kelishib olingan.
Izoh (0)