Prezident Shavkat Mirziyoyev sog‘liqni saqlash tizimini rivojlantirish, tibbiy xizmat sifatini oshirish bo‘yicha vazifalar muhokamasiga bag‘ishlangan 25-fevraldagi yig‘ilishda sohani moliyalashtirish tizimini tanqid qildi, deya xabar bermoqda Prezident matbuot xizmati.
“Sog‘liqni saqlash sohasini moliyalashtirish tizimi tanqidiy tahlil etildi. 20-30 foiz mablag‘ samarasiz sarflanayotgani ko‘rsatib o‘tildi”, — deyiladi davlat rahbarining matbuot xizmati tarqatgan axborotda.
Ta’kidlanishicha, O‘zbekistonda birlamchi tibbiy-sanitariya uchun ajratilayotgan mablag‘ ulushi 35-40 foizni tashkil etadi. Xorijda esa bu ko‘rsatkich 60 foizdan oshadi.
Shuningdek, davlat va xususiy tibbiyot uchun teng shart-sharoit, raqobat muhiti yaratilmagani ham tanqid ostiga olingan. “Moliyalashtirishda elektron tizimning yo‘qligi mablag‘lar unumdorligini tahlil qilish imkonini bermayapti”, — deyiladi rasmiy axborotda.
Shu munosabat bilan, Shavkat Mirziyoyev sohani moliyalashtirishni takomillashtirish, majburiy tibbiy sug‘urtaga oid qonunlar qabul qilib, uni bosqichma-bosqich joriy etish muhimligini ta’kidlab o‘tgan.
Izoh (0)