Президент Шавкат Мирзиёев 25 февраль, сешанба куни, иккинчи Ўзбекистон—Қозоғистон ҳудудлараро ҳамкорлик форуми доирасида Ўзбекистонга келган Қозоғистон бош вазири Асқар Маминни қабул қилди, дея хабар бермоқда давлат раҳбарининг матбуот хизмати.
Учрашувда Шавкат Мирзиёев кейинги йилларда икки мамлакат ўртасидаги кўп қиррали муносабатларнинг ривожланиш суръати тобора ортиб бораётганини қайд этган. Мунтазамлик касб этган олий даражадаги мулоқотлар дўстлик, яхши қўшничилик ва стратегик шерикликни мустаҳкамлашга, икки томонлама ҳамкорликни аниқ мазмун билан бойитишга хизмат қилаётгани таъкидланган.
Асқар Мамин Ўзбекистон Президентига самимий қабул учун миннатдорлик билдириб, Қозоғистоннинг биринчи президенти — Элбоши Нурсултон Назарбоев ва президент Қосим-Жўмарт Тўқаевнинг саломи ва энг эзгу тилакларини етказган.
Президент матбуот хизматининг қайд этишича, учрашувда савдо-иқтисодиёт, инвестиция, транспорт-коммуникация, энергетика, аграр тармоқларда, таълим, маданият соҳалари ва бошқа устувор йўналишларда амалий ҳамкорликни янада кенгайтириш истиқболлари кўриб чиқилган.
Товар айирбошлашдаги юқори ўсиш суръатларини сақлаб қолиш учун қулай шароитлар яратиш, шунингдек, икки мамлакат етакчи компаниялари иштирокида кооперация ва инфратузилмани ривожлантириш лойиҳаларини илгари суриш масалаларига алоҳида эътибор қаратилган.
Қўшма дастурлар асосида гуманитар ва туризм соҳаларида фаол алмашинувларни давом эттириш муҳимлиги қайд этилган. Учрашув сўнгида кенг кўламли Ўзбекистон—Қозоғистон шериклиги доирасида янги иқтисодий кун тартибини шакллантириш бўйича «йўл харитаси»ни тайёрлашга келишиб олинган.
Изоҳ (0)