Buxoroda YPX xodimiga qo‘l ko‘targan fuqaroga nisbatan qamoqqa olish chorasi qo‘llanildi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, Buxoro viloyati IIB Yo‘l harakati xavfsizligi boshqarmasi yo‘l-patrul xizmati otryadi 1-safarbar guruhi katta inspektori, katta serjant Vasil Qurbonov Buxoro shahrida joylashgan “Markaziy dehqon bozori” hududida xizmat vazifasini olib borayotgan paytda Afrosiyob ko‘chasidan harakatlanib kelayotgan, “Niva” rusumli avtomashina haydovchisiga to‘xtash haqida ko‘rsatma beradi. Haydovchi T.N. esa avtomashinani to‘xtatib, undan tushib qochishga harakat qiladi. Haydovchining spirtli ichimlik iste’mol qilganlikda gumon qilgan xodim uning ortidan boradi. T.N. esa qo‘l mushti bilan katta serjantning yuz va ko‘z sohasiga urib, unga tan jarohati yetkazadi. So‘ngra hodisa joyidan yashirinishga urinadi. Biroq T.N. shu yerda xizmat olib borayotgan yo‘l-patrul xizmati xodimlari tomonidan ushlangan.
Buxoro shahar prokuraturasi tomonidan fuqaroga O‘zbekiston Respublikasi JKning 219-moddasi tegishli qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llaganildi.
Katta serjant Vasil Qurbonov tibbiy ko‘rikdan o‘tkazilganda, unda “Yuzi o‘ng qismi yumshoq to‘qimalarining lat yeyishi, o‘ng ko‘z olmasi kontuziyasi bosh miya chayqalishi” bilan kechuvchi tan jarohatlari mavjudligi aniqlangan. Fuqaro T.N.ning esa spirtli ichimlik iste’mol qilgani ma’lum bo‘lgan.
Izoh (0)