Bloger Otabek Nuritdinov Andijon shahrining Asaka tumanidagi Xolid ibn Valid jome masjidi yaqinida spirtli ichimliklar do‘koni ochilgani haqida 18-fevral, seshanba kuni, post joylaganidan so‘ng do‘kon egalari tomonidan kaltaklandi. Bu haqda bloger o‘zining Facebook’dagi sahifasida ma’lum qildi.
“Ushbu rasmga ko‘zim tushib, birinchi kelgan xayol shu do‘konda savdo qilayotgan va do‘kon egalari o‘zimizning o‘zbeklarmikan? deb o‘yladim. Asakadagi ishlab turgan Xolid Ibn Valid masjidi va Asaka tumani hokimligi matbuot xizmatidan munosabatini kutib qolamiz”, — deb yozgan bloger va suratlarni ilova qilgan.
Uning aytishicha, mazkur post e’lon qilingandan chamasi 5 soat o‘tgach, blogerning uyiga bir nafar ayol va ikki nafar yigit kelgan. Ular suratdagi aroq do‘konining egalari ekanligi bildirib, Otabekning telefon raqami va manzilini Asaka shahar IIB xodimlaridan olganini aytgan.
Otabek Nuritdinov ularga: “Agar hujjatlaringizda kamchiliklar bo‘lmasa va mening postimdan biron-bir noroziligingiz bo‘lsa, marhamat qilib IIB xodimlari yoki sudga murojaat qiling”, — deb aytgan. Yigitlar esa agressivlashib, blogerga tan jarohati yetkazib, o‘lim bilan ham tahdid qilgan.
Ma’lumot uchun, “O‘zbekiston Respublikasi hududida alkogolli ichimliklar va pivo bilan chakana savdo qilish to‘g‘risida”gi Vazirlar Mahkamasining 1997-yil 23-oktabrdagi qaroriga 2-ilovada “Alkogolli ichimlik va pivolarni diniy muassasalar va masjidlar yonida sotish taqiqlanadi”, deb qayd etilgan.
Eslatib o‘tamiz, Otabek Nuritdinov taxallusi ostidagi andijonlik bloger Abdufatto Nuritdinov shu yilning yanvar oyida tuhmat va haqoratda ayblanib, 15 sutkaga qamalib chiqqandi. Bloger o‘z postlarida asosan Asaka shahridagi mansabdorlar faoliyatidagi ehtimoliy korrupsion faktlar, budjet mablag‘larini o‘g‘irlash va talon-toroj qilish holatlari haqida yozgan.
Izoh (0)