Наманган шаҳридаги «Ойдин плаза» меҳмонхонасида шаҳар ҳокими Шавкатжон Абдураззақовнинг ёшлар билан учрашуви бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Учрашувга шаҳардаги ўқув курсларида инглиз тили бўйича сабоқ олаётган, IELTS имтиҳонларига тайёрланаётган ва бу синовлардан муваффақиятли ўтган ёшлар ҳамда уларнинг устозлари таклиф қилинди.
Ёшлар билан мулоқот бундай форматдаги учрашувлар учун илк бор тўлиқлигича инглиз тилида кечди.
Ҳоким ёшларни шаҳарда рўй бераётган ўзгариш ва янгиликлардан хабардор қилди. Ўқишларида муваффақият тилаб, дунё тили ҳисобланган инглиз тилини эгаллаш борасидаги интилишларига юксак баҳо берди. Бундай учрашувлар доимий тус олгани, келгусида бошқа йўналишларга қизиқиш билдирган ёшлар билан ҳам мулоқотлар ўтказилишини таъкидлади.
Namangan Square лойиҳаси ижрочи директори Каран Роҳан ёшларни билимларини янада такомиллаштиришга ҳамда хорижнинг нуфузли олий ўқув юртларида таҳсил олишга чорлади. Келгусида ушбу компаниянинг етакчи ходимлари сафини тўлдиришларига ишонч билдирди.
Наманган шаҳри фарзанди, Жанубий Кореядаги Ённам университети профессори Алишер Дедаханов ўзи босиб ўтган йўл ҳақида қисқача ҳикоя қилди. Бугунги кунда яратилган имкониятлардан тўлақонли фойдаланиш лозимлиги, янгиланаётган мамлакат учун иқтидорли ва салоҳиятли ёшлар жуда керак эканлигини билдирди.
Учрашувда IELTS имтиҳонларига тайёрланаётган 10 нафар ёшнинг ҳар бирига 1,6 миллион сўмдан, ўқув марказларида таҳсил олаётган 10 нафар йигит-қизга эса 600 минг сўмдан пул мукофотлари топширилди.
IELTS синовларидан юқори баллар билан ўтган 5 нафар ёшга компьютер жамланмаси совға қилинди. Шунингдек, ҳар бир иштирокчига инглиз тили луғати тақдим қилинди.
Ёшлар билан мулоқот бир пиёла чой устидаги самимий суҳбат ва санъаткорларнинг чиқишлари билан давом этди.
Изоҳ (0)