O‘zbekiston delegatsiyasi MAGATE tomonidan 2020-yilning 10—14-fevral kunlari tashkilotning Venadagi bosh qarorgohida o‘tkazilayotgan Fizikaviy yadroviy xavfsizlik bo‘yicha xalqaro anjumanda ishtirok etmoqda. Bu haqda Energetika vazirligi matbuot xizmati ma’lum qildi.
Anjumanning ochilishida Atom energiyasi bo‘yicha xalqaro agentlik (MAGATE) bosh direktori Rafael Mariano Grossi so‘zga chiqdi.
Konferensiya davomida tashkilotga a’zo davlatlar ma’ruzalariga jiddiy e’tibor qaratildi. O‘zbekiston nomidan anjumanda energetika vaziri Alisher Sultonov so‘zga chiqdi.
Ma’ruzada ta’kidlanganidek, mustaqillikka erishilgandan buyon o‘tgan yillar davomida O‘zbekiston Respublikasi yadroviy qurolsizlanish va ommaviy qirg‘in qurolini tarqatmaslik jarayonlariga izchil ravishda sodiq bo‘lib qolmoqda. Shuningdek, Yadro qurolini tarqatmaslik to‘g‘risidagi shartnoma hamda O‘zbekiston Respublikasi va MAGATE o‘rtasidagi kafolatlarni qo‘llash to‘g‘risidagi bitim bo‘yicha o‘z majburiyatlarini og‘ishmay qat’iy bajarib kelmoqda.
O‘zbekiston hukumati tomonidan mamlakatning barqaror iqtisodiy rivojlanishini ta’minlash, shuningdek, elektr energiyasiga ortib borayotgan talabni qondirish uchun energetika tarmog‘ining kelgusi rivojlanishini chuqur va har tomonlama tahlil qilish asosida o‘zining yadroviy energetikasini yaratish bo‘yicha taklif ishlab chiqilgan. Ushbu taklifni tayyorlashda ko‘p sonli omillar, jumladan, energetik xavfsizlikni ta’minlash zaruriyati, atrof-muhitga uglerod chiqarilishi miqdorini qisqartirish va boshqalar hisobga olindi.
Birinchi atom elektr stansiyasini qurish bo‘yicha qaror qabul qilinishi yadroviy infratuzilmani yaratish bo‘yicha faoliyatni rivojlantirish uchun turtki bo‘lib xizmat qildi. Jumladan, “Atom energiyasidan tinchlik maqsadlarida foydalanish to‘g‘risida”gi qonun qabul qilindi. 2019—2029-yillarda O‘zbekiston Respublikasida atom energetikasinirivojlantirish konsepsiyasi va mamlakatning yadroviy-energetik dasturi uchun kadrlar salohiyatini rivojlantirish strategiyasi qabul qilindi.
Energetika vaziri tashkilot bilan samarali hamkorlikni qayd etib o‘tdi, uning doirasida 2020-yilning birinchi yarmida MAGATE yuqori malakali ekspertlarini jalb qilgan holda 15 ta milliy seminar o‘tkazilishi rejalashtirilgan. Yanvar oyida, xususan, Toshkentda Yadroviy xavfsizlik to‘g‘risidagi konvensiyaga qo‘shilish masalalariga bag‘ishlangan seminar bo‘lib o‘tdi.
MAGATE bilan hamkorlikning muhim qismi atom energetikasi mavjud rivojlangan mamlakatlar tajribasini o‘rganishdan iborat bo‘lib, bu O‘zbekiston Respublikasi kabi yadroviy-energetika dasturini rivojlantirishda endi ilk qadamlarini qo‘yayotgan mamlakat uchun muhim ahamiyat kasb etadi. Shu maqsadda O‘zbekiston delegatsiyalari Fransiya, Vengriya, Rossiya, Ukraina, Yaponiyaning atom elektr stansiyalari faoliyati bilan tanishdi.
Milliy yadroviy infratuzilma holatini har tomonlama kompleks baholash hamda yadroviy-energetika dasturining xavfsizligi, ishonchliligi va barqarorligini ta’minlash maqsadida O‘zbekiston 2020-yilda MAGATE Yadroviy infratuzilmasini kompleks ko‘rib chiqish bo‘yicha missiyasining o‘tkazilishi yuzasidan so‘rov yuborgan va bu 2020-yilning oktabrida bo‘lib o‘tishi tashkilot tomonidan ma’qullangan.
Izoh (0)