Ўзбекистон делегацияси МАГАТЭ томонидан 2020 йилнинг 10—14 февраль кунлари ташкилотнинг Венадаги бош қароргоҳида ўтказилаётган Физикавий ядровий хавфсизлик бўйича халқаро анжуманда иштирок этмоқда. Бу ҳақда Энергетика вазирлиги матбуот хизмати маълум қилди.
Анжуманнинг очилишида Атом энергияси бўйича халқаро агентлик (МАГАТЭ) бош директори Рафаэл Мариано Гросси сўзга чиқди.
Конференция давомида ташкилотга аъзо давлатлар маърузаларига жиддий эътибор қаратилди. Ўзбекистон номидан анжуманда энергетика вазири Алишер Султонов сўзга чиқди.
Маърузада таъкидланганидек, мустақилликка эришилгандан буён ўтган йиллар давомида Ўзбекистон Республикаси ядровий қуролсизланиш ва оммавий қирғин қуролини тарқатмаслик жараёнларига изчил равишда содиқ бўлиб қолмоқда. Шунингдек, Ядро қуролини тарқатмаслик тўғрисидаги шартнома ҳамда Ўзбекистон Республикаси ва МАГАТЭ ўртасидаги кафолатларни қўллаш тўғрисидаги битим бўйича ўз мажбуриятларини оғишмай қатъий бажариб келмоқда.
Ўзбекистон ҳукумати томонидан мамлакатнинг барқарор иқтисодий ривожланишини таъминлаш, шунингдек, электр энергиясига ортиб бораётган талабни қондириш учун энергетика тармоғининг келгуси ривожланишини чуқур ва ҳар томонлама таҳлил қилиш асосида ўзининг ядровий энергетикасини яратиш бўйича таклиф ишлаб чиқилган. Ушбу таклифни тайёрлашда кўп сонли омиллар, жумладан, энергетик хавфсизликни таъминлаш зарурияти, атроф-муҳитга углерод чиқарилиши миқдорини қисқартириш ва бошқалар ҳисобга олинди.
Биринчи атом электр станциясини қуриш бўйича қарор қабул қилиниши ядровий инфратузилмани яратиш бўйича фаолиятни ривожлантириш учун туртки бўлиб хизмат қилди. Жумладан, «Атом энергиясидан тинчлик мақсадларида фойдаланиш тўғрисида»ги қонун қабул қилинди. 2019—2029 йилларда Ўзбекистон Республикасида атом энергетикасини ривожлантириш концепцияси ва мамлакатнинг ядровий-энергетик дастури учун кадрлар салоҳиятини ривожлантириш стратегияси қабул қилинди.
Энергетика вазири ташкилот билан самарали ҳамкорликни қайд этиб ўтди, унинг доирасида 2020 йилнинг биринчи ярмида МАГАТЭ юқори малакали экспертларини жалб қилган ҳолда 15 та миллий семинар ўтказилиши режалаштирилган. Январь ойида, хусусан, Тошкентда Ядровий хавфсизлик тўғрисидаги конвенцияга қўшилиш масалаларига бағишланган семинар бўлиб ўтди.
МАГАТЭ билан ҳамкорликнинг муҳим қисми атом энергетикаси мавжуд ривожланган мамлакатлар тажрибасини ўрганишдан иборат бўлиб, бу Ўзбекистон Республикаси каби ядровий-энергетика дастурини ривожлантиришда энди илк қадамларини қўяётган мамлакат учун муҳим аҳамият касб этади. Шу мақсадда Ўзбекистон делегациялари Франция, Венгрия, Россия, Украина, Япониянинг атом электр станциялари фаолияти билан танишди.
Миллий ядровий инфратузилма ҳолатини ҳар томонлама комплекс баҳолаш ҳамда ядровий-энергетика дастурининг хавфсизлиги, ишончлилиги ва барқарорлигини таъминлаш мақсадида Ўзбекистон 2020 йилда МАГАТЭ Ядровий инфратузилмасини комплекс кўриб чиқиш бўйича миссиясининг ўтказилиши юзасидан сўров юборган ва бу 2020 йилнинг октябрида бўлиб ўтиши ташкилот томонидан маъқулланган.
Изоҳ (0)