Namanganda davlat xizmatlari markazlari tomonidan o‘tgan yili millionga yaqin, aniqrog‘i, 941 256 ta murojaat ko‘rib chiqildi. Bu 2018-yilga nisbatan ikki baravar ko‘p, deya xabar beradi “Daryo” muxbiri Azizbek Abduvaliyev.
DXA viloyat boshqarmasi boshlig‘i vazifasini bajaruvchi Husniddin Ahmedovning ma’lum qilishicha, murojaatlarning asosiy qismi INN olish, bolalarni maktabgacha ta’lim tashkilotiga joylash, tadbirkorlik tuzilmalarini ro‘yxatga olish, haydovchilik guvohnomalarini yangilashdan iborat.
Davlat xizmatlari markazlarida fuqarolarga qulayliklar yaratish maqsadida onlayn navbat joriy etilgan. Markazga kelgan mijozlar istagiga ko‘ra navbatsiz xizmat ko‘rsatish ham yo‘lga qo‘yilgan. Buning uchun belgilangan miqdorda, ya’ni bazaviy hisoblash miqdorining 30 foizidan 45 foizigacha to‘lovni amalga oshirish kifoya.
“Daryo” muxbirining avvallari boshqarma va markazlar xodimlari ish vaqti me’yorlanmaganidan noligani, hozirda bu borada ahvol qanday ekanligi haqidagi savoliga javoban ish vaqti mehnat kodeksiga binoan tashkil etilgani, ya’ni soat 09:00 dan 18:00 gacha davom etayotgani, zarurat tug‘ilgan taqdirda jadval asosida navbatchilik tashkil etilishi, shanba-yakshanba — dam olish kunlari ekanligi bildirildi.
Davlat xizmatlari markazlarida ish haqi o‘rtacha 2,5—3 million so‘m atrofida bo‘lgani va pullik xizmatlar hisobidan qo‘shimcha rag‘bat pullari ham berilgani bois, ularda ishlash istagida bo‘lganlar ko‘p. Jurnalistlar bilan o‘tkazilgan matbuot anjumanida aytilishicha, bo‘sh ish o‘rinlari haqida agentlik sayti va ijtimoiy tarmoqlarda muntazam e’lonlar berib boriladi. Nomzodlar bilan suhbat o‘tkaziladi va xolislikni ta’minlash uchun bu jarayon onlayn tarzda amalga oshiriladi.
Hozirda viloyat mahallalarida aholi ehtiyojlaridan kelib chiqib davlat xizmatlari markazlari infokiosklarini tashkil etishga taraddud ko‘rilmoqda. Shuningdek, olisda joylashgan Pop tumanining Chodak va Chortoq tumanidagi Baliqliko‘l qishloqlarida alohida shoxobchalar ochilishi rejalashtirilgan.
Izoh (0)