O‘zbekiston Moliya vazirligi davlat xizmatchilariga xizmat avtomobillari ajratishni tartibga solishga qaratilgan yangi me’yoriy hujjat ustida ishlamoqda. Bu haqda Moliya vazirligi matbuot xizmatiga tayanib, “Gazeta.uz” xabar berdi.
Ma’lum qilinishicha, Prezidentning 2019-yil 30-dekabrdagi qaroriga binoan, Transport vazirligi Moliya vazirligi bilan birgalikda joriy yilning 1-iyuniga qadar davlat muassasalarida yengil avtomobillar sonini belgilash, shuningdek, sinflarga qarab rahbar xodimlarga xizmat avtomobillarini tayinlash tartibini ishlab chiqishi kerak.
Moliya vazirligi tomonidan ta’kidlanishicha, ushbu yo‘nalishda amaldagi qonunchilik “juda eskirgan”. Vazirlar Mahkamasining 2011-yil 26-maydagi qarori bilan davlat budjetidan moliyalashtiriladigan vazirliklar, idoralar va ularga bo‘ysunuvchi tashkilotlar apparatlari, hokimliklar apparatlarining (2011-yil may oyi yakuniga ko‘ra, respublikada 3184 ta) va xo‘jalik subyektlari (7344 ta) xizmat transport vositalarining maksimal soni belgilangan.
“Ushbu hujjat 2011-yilda chiqarilgan. To‘qqiz yil o‘tdi. So‘nggi uch yil ichida qanday islohotlar amalga oshirilayotganiga e’tibor bergan bo‘lsangiz kerak. Yangi tashkilotlar va idoralar paydo bo‘ldi, ba’zi vazirliklar birlashtirildi, ba’zilari bo‘lindi. Endi ushbu hujjatni qayta ko‘rib chiqish zarurati paydo bo‘ldi”, — deb ta’kidlangan Moliya vazirligi tomonidan.
Vazirlik xizmat avtomobillarini ajratishda va uning sinfini aniqlashda qiyinchiliklar mavjudligi sababli xarajatlarni optimallashtirish bo‘yicha xalqaro amaliyotni o‘rganmoqda.
“Masalan, yangi agentlik ochildi. Xizmat avtomobilini agentlik direktori va o‘rinbosariga ajratish bo‘yicha ko‘rsatma berildi. Lekin ular qaysi avtomobil turini tanlashi kerak? Agentlik yuqori sinfdagi avtomobilni olishni xohlaydi va biz budjet mablag‘laridan unumli foydalanish uchun ushbu sinfdagi avtomobil sizga mos keladi deb aytamiz”, — deya ta’kidlagan vazirlik vakili.
Yangi hujjatni ishlab chiqishda xizmat avtoulovi sinflarini aniq belgilash bo‘yicha taklif berish rejalashtirilgan.
“Vazir uchun shartli ravishda ‘A’ sinfdagi avtoulov, uning o‘rinbosari — ‘B’ sinfdagi avtomashina, boshqa xodimlar — boshqa sinfdagi avtomobillar”, — deyiladi vazirlik xabarida.
Vazirlar Mahkamasining qarorida shaxsiy, navbatchi xizmat transport vositalari va maxsus transport vositalari nazarda tutilgan. Moliya vazirligining ta’kidlashicha, ko‘pincha shaxsiy avtomashinasi sifatida Chevrolet Malibu va chet el avtomobillari taqdim etiladi.
Qayd etilishicha, xorijiy markadagi avtomobilni sotib olish mumkinmi yoki yo‘qmi, degan savol ochiq qolmoqda. Yangi hujjat ushbu savolga javob berishi hamda tushunmovchiliklarni bartaraf qilishi kerak.
Nashrning yoizishicha, hukumatning 1999-yil 2-apreldagi qarori bilan shaxsiy xizmat avtotransport vositalari quyidagilarga biriktiriladi:
- vazirlar, davlat qo‘mitalari, idoralar va boshqa respublika jamoat tashkilotlari va budjetdan moliyalashtiriladigan organlar rahbarlari, shuningdek, ularning o‘rinbosarlari;
- Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari, shahar va tumanlarning hokimlari, ularning birinchi o‘rinbosarlari va o‘rinbosarlari, shuningdek, budjetdan moliyalashtiriladigan hududiy tuzilmalar rahbarlari.
Izoh (0)