Андижон вилояти ҳокими ўринбосарига тегишли эканлиги айтилаётган беҳаё ёзишма скрини тарқалди. Ҳокимлик ва прокуратура баёнот берди

Ижтимоий тармоқларда Андижон вилояти ҳокими матбуот котиби Мирзоҳид Ботировга тегишли экани айтилаётган ёзишмаларнинг нусхаси (скриншот) тарқалди, деб ёзади «Xabar.uz».

Унда Мирзоҳид Ботиров ўзига таниш ва анча синашта бўлган бошқа фойдаланувчи билан «дилдан суҳбат» қургани англашилади. Ҳақорат-у уятсиз гапларга тўла ёзишмаларда гап айланиб, блогерларга тақалган пайтда матбуот котиби «...осмонга чиқаётган блогерни жойини кўрсатиб қўйгани»ни алоҳида таъкидлаб, «15 кунда мулла бўлгани»га урғу беради. Шунингдек, ёзишмаларда ўша блогер «асакалик» экани, «ҳоким тиқ» дегани учун «тиқилгани»ни ёзиб бўлмас ҳақоратлар билан баён қилинади.

Андижон вилояти ҳокимлиги матбуот хизмати ушбу ёзишма юзасидан баёнот берди.

«Facebook ижтимоий тармоғида ‘Ёшлар олами’ аккаунти билан фойдаланувчи Мирзоҳид Ботировнинг ушбу аккаунти хакерлик ҳужумига учраган бўлиб, Мирзоҳид Ботиров 2020 йилнинг 8 февраль куни ушбу ҳолатлардан хабар топган ва шу куннинг ўзидаёқ вилоят прокуратурасига ариза билан мурожаат қилган. Ҳозирда ҳуқуқ-тартибот органлари томонидан скриншотдаги ёзишмалар ким томонидан олиб борилганлигига аниқлик киритилмоқда.

Ушбу хабарлар тафсилоти бўйича қўшимча маълумот тақдим этилади», — дейилади ҳокимлик баёнотида.

Андижон вилояти прокуратураси ҳам ушбу ёзишма юзасидан баёнот берди.

«Ижтимоий тармоқларда Андижон вилояти ҳокими матбуот котиби Мирзоҳид Ботировга тегишли экани айтилаётган ёзишмалари юзасидан текшириш ҳаракатлари ўтказилмоқда. Шу билан бирга, Мирзоҳид Ботировнинг мурожаатида кўрсатилган важлар ўрганилмоқда. Натижалари ҳақида қўшимча равишда хабар қилинади.», – дейилади Андижон прокуратураси баёнотида.